वांगणी - बुधवारी सकाळी 7.54 च्या दरम्यान मालगाडीचे डब्बे इंजिनापासून वेगळे झाल्याची घटना घडली आहे. कल्याण - कर्जत लोहमार्गावरील वांगणी ते नेरळ रेल्वे स्थानक दरम्यान ही घटना घडली असून याचा परिणाम रेल्वेच्या वेळापत्रकावर झाला आहे.

कर्जत मार्गावरील लोकसेवा ही उशिराने धावत आहे. रक्षाबंधन असल्याने चाकर मान्यांसह अन्य प्रवासी आज लोकलने प्रवास करीत आहेत. त्यात हा गोंधळ झाल्याने प्रवासी ताटकळत स्थानकांत उभे आहेत.

बुधवारी रक्षाबंधन असल्याने नागरिकांची सकाळी गैरसोय झाली आहे. कल्याण - कर्जत मार्गावर बदलापूर, नेरळ, वांगणी दरम्यान लोकसेवा धीम्या गतीने सुरू असून प्रवासी ताटकळले आहेत.

लवकरात लवकर समस्या सुटावी आणि प्रवास सूरु व्हावा अशी मागणी प्रवाशांनी केली. मंगळवारी देखील कल्याण मार्गावर फलाट 6 व 7 सिग्नल यंत्रणेत बिघाड झाला होता, त्यामुळे समस्या झाली होती. सकाळी पहिल्या सत्रातच बिघाड होत असल्याने रेल्वे प्रवासी, चाकरमान्यांचे हाल होत आहेत. रेल्वेच्या भोंगळ कारभाराचा फटका सामान्यांना बसत असल्याने प्रचंड नाराजी व्यक्त होत आहे. कुटुंबासह निघालेल्या नागरिकांचे बुधवारच्या घटनेमुळे ठिकठिकाणी हाल झाले.

डबे पुन्हा जोडण्याचे काम करून रेल्वे सेवा पूर्ववत करण्यात येईल असेही रेल्वे प्रशासनाकडून सांगण्यात आले आहे. घडल्या घटनेबाबत घटनास्थळी संबंधित कर्मचारी वर्ग गेला असून डबे लवकरच जोडण्यात येतील असे सांगण्यात आले.