मुंबई: राज्य सरकारने अनलॉक (unlock) संदर्भात मोठी घोषणा केली आहे. मुंबईसह राज्याच्या अनेक भागांमध्ये कोरोना रुग्णांची संख्या कमी होतेय. त्या पार्श्वभूमीवर राज्य सरकारने अनलॉकसाठी पाच स्तरीय योजना जाहीर केलीय. जिल्ह्यांमधील कोरोनाचा पॉझिटिव्हिटी रेट आणि ऑक्सिजन बेडसवर असलेले रुग्ण ही बाब ध्यानात घेऊन अनलॉकचा प्लान आखला आहे. (Mumbai local service could be resumed next week)

जे जिल्हे लेव्हल १ मध्ये आहेत, तिथे सर्वकाही सुरु होणार आहे. पण जे जिल्हे लेव्हल २ मध्ये आहेत तिथे काही मर्यादा आहेत. मुंबई लेव्हल २ मध्ये आहे, त्यामुळे मुंबईत लोकल सुरु होणार नाही. पण त्याचवेळी मुंबई शेजारचा ठाणे जिल्हा लेव्हल १ मध्ये आहे. तिथे सार्वजनिक वाहतूक म्हणजे बस सेवा पूर्ण क्षमतेने सुरु होईल.

पहिल्या लेव्हलमध्ये ते जिल्हे आहेत, ज्यांचा पॉझिटिव्हिटी रेट ५ टक्क्यांच्या खाली आणि बेड ऑक्युपंसी २५ टक्क्यांच्या आत आहे. मुंबई लेव्हल २ मध्ये आहे. त्यामुळे मुंबईत लोकल सुरु होणार नाही. पण दर आठवड्याला जिल्ह्यांच्या पॉझिटिव्हिटी रेटचा आढावा घेण्यात येईल. त्यामुळे पुढच्या आठवड्यात मुंबईचा पॉझिटिव्हिटी रेट ५ टक्क्यांच्या खाली आला, तर लोकल सुरु होईल, असे मदत आणि पुर्नवसन मंत्री विजय वडेट्टीवार यांनी सांगितलं.