मुंबई : दोन वर्षांनंतर मुंबई विद्यापीठाची (Mumbai university) सिनेटची सर्वसाधारण सभा (Senate meeting) उद्या (ता. ७) विद्यापीठाच्या दीक्षांत सभागृहात ऑफलाईन (offline) पद्धतीने होणार आहे. या सिनेटमध्ये विद्यापीठातील विविध प्रश्नांवर वादळी चर्चा (big discussion) होण्याची शक्यता व्यक्त केली जात आहे.

विद्यापीठ प्रशासनाने सिनेटच्या आयोजनाची तयारी केली असून सदस्यांना विविध प्रश्नांवर बोलण्यासाठी बराच वेळ मिळणार असल्याचे विद्यापीठ प्रशासनाकडून सांगण्यात आले. दोन दिवस कामकाज चालण्यासाठी विद्यापीठ प्रशासनाकडून जोरदार तयारी करण्यात आली आहे. दरम्यान, विद्यापीठाची सिनेट ऑनलाईन घेण्याची शक्यता होती; मात्र सदस्यांकडून ऑफलाईन पद्धतीने सिनेट घेण्याची मागणी केली होती.

अखेर विद्यापीठाने मंगळावारी (ता. ५) रात्री सिनेट ऑफलाईन पद्धतीने होणार असल्याचे जाहीर केले. कुलगुरू प्रा. सुहास पेडणेकर यांनी खरेदी केलेली महागडी गाडी, तसेच विद्यापीठाने गेल्या काही वर्षांपासून न केलेल्या लेखापरिक्षाणासह अनेक विषयांवर युवा सेनेचे सिनेट सदस्य कुलगुरूंना धारेवर धरण्याची शक्यता आहे, विविध शैक्षणिक उपक्रमांबाबत मनविसेचे सिनेट सदस्य सुधाकर तांबोळी यांनीही प्रशासनाला जाब विचारणार असल्याचे सांगितले.