Mokhada Crime : मोखाड्यात हत्या करून मृतदेह फेकून देण्याच्या घटना सातत्याने घडत आहेत. शनिवारी 10 फेब्रुवारी ला रात्री साडेदहाच्या सुमारास मोखाड्यातील टाकपाडा जवळील जंगलात नदीकाठी एका तरूणाची हत्या करून अर्धवट जाळण्याची घटना घडली आहे.

यापूर्वी मध्यवैतरणा धरणाच्या पुल परिसरात हत्या केलेले दोन मृतदेह आढळले होते. एका आठवड्यात हत्या करून मृतदेह फेकून देण्याची ही तिसरी घटना मोखाड्यात घडल्याने खळबळ उडाली आहे. त्यामुळे हत्या करून मृतदेह फेकून देण्याचे मोखाडा ठिकाण बनले आहे.

मोखाड्यातील मध्यवैतरणा धरणाच्या पुलावर 3 फेब्रुवारी ला अंगावर वार केलेला मृतदेह आढळला होता. त्यानंतर 7 फेब्रुवारी ला एका महिलेचा शिरच्छेद केलेला मृतदेह याच पुलाच्या खाली आढळून आला आहे. या घटना ताज्या असतांना आणि पोलीसांचा तपास सुरु असताना, शनिवारी 10 फेब्रुवारी ला रात्री टाकपाडा जवळील जंगलात नदीकाठी एका तरूणाची हत्या करून अर्धवट जाळलेला मृतदेह आढळला आहे. त्यामुळे मोखाड्यात खळबळ उडाली आहे.

दरम्यान, मोखाडा पोलीसांकडून मिळालेल्या माहितीनुसार, सदरच्या मृतदेहाची ओळख पटलेली असुन मृत तरूणाचे संदेश काजळे असे नाव आहे. त्याचे अपहरण झाल्याची तक्रार नाशिक च्या पंचवटी पोलीस ठाण्यात दाखल झालेली आहे. सदरच्या तरुणाच्या अंगावर धारधार शस्रांनी वार केलेले असुन त्याचा मृतदेह अर्धवट जळालेल्या स्थितीत आढळून आला आहे. या घटनेची मोखाडा पोलीस ठाण्यात अकस्मात मृत्यू ची नोंद करण्यात आली आहे.