ठाणे : अमली पदार्थविरोधी पथकाचे माजी संचालक समीर वानखेडे (Sameer Wankhede) यांच्यावर फसवणूक केल्याप्रकरणी गुन्हा दाखल (Police complaint filed) करण्यात आला आहे. नवी मुंबई (Navi mumbai) येथे बारच्या परवान्यासाठी खोटी कागदपत्रे सादर केल्याचा आरोप त्यांच्यावर आहे. याप्रकरणी राज्य उत्पादन शुल्क विभागाच्या (Excise department) ठाणे विभागाच्या तक्रारीवरून त्यांच्याविरोधात कोपरी पोलिस ठाण्यात गुन्हा दाखल करण्यात आला आहे.

काही दिवसांपूर्वीच ठाण्याचे जिल्हाधिकारी राजेश नार्वेकर यांच्या आदेशाने नवी मुंबई येथील समीर वानखेडे यांच्या रेस्ट्रॉ बारचा परवाना रद्द करण्यात आला होता. नवी मुंबईतील समीर वानखडे यांच्या रेस्ट्रॉ बारचे नाव सदगुरु आहे. उत्पादन शुल्क विभागाच्या माहितीनुसार या बारसाठीचा परवाना २७ ऑक्टोबर १९९७ ला देण्यात आला होता. त्यावेळी वानखेडे हे सज्ञान नसल्याने त्यांचा परवाना रद्द करण्याचे आदेश जानेवारीत ठाणे जिल्हाधिकारी राजेश नार्वेकर यांनी दिले होते. या बारचा परवाना ३१ मार्च २०२२ पर्यंत वैध आहे.

यासाठी समीर वानखेडेंच्या जन्मतारखेत म्हणजेच वयामध्ये विसंगती असल्याचे कारण देण्यात आले होते. ज्या वेळेस या बारचा परवाना देण्यात आला होता, त्यावेळेस ते सज्ञान नसल्यानेच हा परवाना रद्द करण्यात आला आहे. जानेवारी महिन्यात ही कारवाई करण्यात आली होती. आता याच सदगुरु बार आणि रेस्ट्रॉसाठी खोटी कागदपत्रे सादर करून शासनाची फसवणूक केल्याप्रकरणी वानखेडे यांच्याविरोधात कोपरी पोलिस ठाण्यात गुन्हा दाखल करण्यात आला.