डोंबिवली : दिव्यातील भाजपच्या (BJP) दोन मंडळ अध्यक्षांना शिवसेनेने (Shivsena) आपल्या चमूत खेचल्याने दिव्यातील भाजपचा नविन मंडळ अध्यक्ष कोण याची चर्चा गेले काही दिवस रंगली होती. निष्ठावंत पदाधिकाऱ्यावरच ही जबाबदारी सोपविली जाणार असल्याचे बोलले जात असल्याने गेले अनेक वर्षे भाजपचा झेंडा हाती धरलेले रोहीदास मुंडे (Rohidas Munde) यांचे नाव अध्यक्षपदासाठी पुढे येत होते. अखेर रविवारी दिवा मंडळ अध्यक्षपदी मुंडे यांची नियुक्ती करत पक्षाने त्यांच्यावर दिव्याची (Diva) जबाबदारी सोपविली आहे.

भारतीय जनता पार्टी दिवा शहर यांच्यावतीने रविवारी आयोजित कार्यक्रमात भाजपाचे ठाणे जिल्हा अध्यक्ष निरंजन डावखरे यांनी रोहिदास मुंडे यांची दिवा मंडळ अध्यक्ष म्हणून नियुक्ती केल्याचे जाहीर केले. यावेळी माजी राज्यमंत्री रविंद्र चव्हाण, माजी मंत्री जगन्नाथ पाटील, आमदार संजय केळकर यांसह अनेक मान्यवर उपस्थितीत होते. यावेळी दिव्यातील अनेक कार्यकर्त्यांनी भाजपा मध्ये पक्षप्रवेश देखील केला.

आमदार चव्हाण यांचा खासदार शिंदे यांच्यावर हल्लाबोल

भाजपचे दिवा मंडळ अध्यक्ष आदेश भगत व निलेश पाटील यांना शिवसेनेने आपल्या चमूत घेत विरोधक भाजपाची ताकद कमी करण्याचा प्रयत्न केला आहे. यावर आमदार चव्हाण यांनी सेनेवर निशाणा साधत म्हणाले, गर्दी जमविण्यापेक्षा आमच्याकडे निष्ठावान कार्यकर्ते किती आहेत हे पाहिले पाहीजे. निष्ठावान कार्यकर्ते पाच जरी असले तरी पाच जणांच्या जोरावर आपण काय करू शकतो हे आता दाखवून देऊ.

त्यानंतर चव्हाण यांनी थेट खासदार डॉ. श्रीकांत शिंदे यांच्यावर हल्लाबोल केला. खासदार डॉ. श्रीकांत शिंदे यांनी दिवेकरांसाठी एक हॉस्पिटल करणे गरजेचे होते. मात्र त्यांच्या येथील बगलबच्चासाठी त्यांनी हे केले नाही. येथील भूखंड गिळंकृत करून त्यावर अनधिकृत बांधकाम त्यांना उभारायचे आहे असे ते म्हणाले.

सत्ताधाऱ्यांनी विकासाचा कसा बट्ट्याबोळ केला हे आपण सर्वच जाणतो. दिव्याची लोकसंख्या आज अडीच लाखाच्या घरात गेली असून येथे एक हॉस्पिटल व्हावे यासाठी भाजपा संघर्ष करेल असेही चव्हाण यावेळी म्हणाले.