कामा रुग्णालय प्राणवायूसंपन्न
रुग्णालयातील ऑक्सिजन प्रकल्पाला मंजुरी
सकाळ वृत्तसेवा
मुंबई, ता. १७ : कोरोनासारख्या महामारीवेळी प्राणवायूची सहज उपलब्धता व्हावी, यासाठी कामा आणि आल्बेस रुग्णालयात लिक्विड मेडिकल ऑक्सिजन प्लांट उभारण्यात आला आहे. या प्रकल्पाला पेट्रोलियम अँड एक्सप्लोझिव्ह सेफ्टी ऑर्गनायझेशनकडून (पीइएसओ) वापरासंदर्भात मंजुरी मिळाली आहे. त्यामुळे रुग्णालयाची ऑक्सिजनवरील स्वावलंबन क्षमता वाढली असल्याचे अधीक्षक डॉ. तुषार पालवे यांनी म्हटले आहे.
कोरोनाकाळात देशभरात ऑक्सिजनचा तुटवडा निर्माण झाला होता. कामा रुग्णालयही त्यास अपवाद नव्हते. त्यातून धडा घेत रुग्णालयाने लिक्विड ऑक्सिजन प्रकल्प उभारण्याचा निर्णय घेतला; मात्र त्यासाठी ‘पीइएसओ’च्या काही परवानग्यांची प्रतीक्षा होती. नुकतीच त्यास मंजुरी मिळाल्याने ऑक्सिजन प्रकल्प कार्यान्वित होणार आहे. सध्या रुग्णालयात दररोज सुमारे ९८ हजार किलो ऑक्सिजनची गरज भासते. यापूर्वी सात हजार किलो क्षमतेचे १४ सिलिंडर वापरावे लागत होते. नव्या प्रकल्पामुळे आता साठवण क्षमता सुमारे एक कोटी लिटरपर्यंत वाढली आहे. परिणामी, महिन्यातून फक्त एकदाच टाकी भरावी लागेल. विशेष म्हणजे या प्रकल्पातून आपत्कालीन परिस्थितीत जीटी तसेच सेंट जॉर्ज रुग्णालयालाही ऑक्सिजन पुरवठा करता येईल, असेही डॉ. पालवे यांनी सांगितले.
---
ऑक्सिजन प्रकल्पाला मंजुरी मिळाल्याने आता कामा रुग्णालय प्राणवायूसंदर्भात स्वयंपूर्ण झाले आहे. भविष्यातील आपत्कालीन परिस्थितीला तोंड देण्यासाठी रुग्णालय सज्ज आहे.
- डॉ. तुषार पालवे, अधीक्षक, कामा रुग्णालय