विरार, ता. ४ (बातमीदार) : नालासोपारा पश्चिमेकडे उड्डाणपुलाखालील स्टेशनला जाणाऱ्या रस्त्यावरील खड्ड्याचे डांबरीकरण न झाल्याने ठिकठिकाणी खड्डे पडले होते. नालासोपारा स्टेशनला जाण्यासाठी हा एकमेव मार्ग असल्याने या रस्त्यावर वाहनांची प्रचंड वर्दळ असते. रस्त्यावरील खड्ड्यामुळे वाहनचालकांना अपघाताचा धोका निर्माण झाल्याने या रस्त्यावरील पडलेल्या खड्ड्यांच्या डांबरीकरणाची मागणी रिक्षा चालक - मालक संघटनेचे पदाधिकारी व स्थानिक नागरिकांनी शिवसेनेकडे केली होती. याबाबत शिवसेनेकडून उपोषण करण्यात आले होते. यावेळी प्रभाग समिती ‘ई’चे सहायक आयुक्त यांनी लेखी आश्वासनानंतर रात्रीच खड्डे बुजवण्यास सुरुवात केली. महिला आघाडी शहर संघटक रुचिता नाईक, शहरप्रमुख समीर गोलांबडे, उपशहरप्रमुख आनंद नगरकर, उपशहरप्रमुख महेश निकम, विभागप्रमुख किरण काळे, उपविभागप्रमुख सचिन परब यांनी या आंदोलनात सहभाग घेतला होता.