शहापूर, ता. १० (वार्ताहर) : तालुक्यातील खराडे ग्रामपंचायत हद्दीतील अंबरपाडाला जोडणारा पूल पुरामुळे वाहून गेला आहे. त्यामुळे कातकरी वस्तीतील ग्रामस्थांना गळ्यापर्यंतच्या खोल पाण्यातून खराडे गावात यावे लागत आहे.
शेणवे-डोळखांब मुख्य रस्त्याजवळील खराडे गावातील अंबरपाडा आदिवासी वस्ती आहे. कातकरी समाजाची ४० घरे वर्षानुवर्षे वास्तव्यास आहेत. या आदिवासी वस्तीकडे जाण्यासाठी ओढा आहे. १३ वर्षांपूर्वी या ओढ्यावर लहान साकव बांधला होता, परंतु पावसाच्या पुरामध्ये वाहून गेल्याने रहिवाशांना गळाभर पाण्यातून वाट काढावी लागत आहे. ६० मीटर लांबीच्या या ओढ्यावर पूल व्हावा, अशी वारंवार मागणी केली जात आहे, पण प्रशासनाच्या दुर्लक्षामुळे पूल उभारण्यात आला नसल्याने ग्रामस्थांची गैरसोय होत आहे.
------------------------------------------
धोकादायक मार्गाने प्रवास
पावसाळ्यात ओढा ओलांडण्याची विदारक स्थिती असल्याने शाळेत जाण्यासाठी येथील विद्यार्थी धोकादायक मार्गाने प्रवास करीत आहेत. जोडरस्ताही नसल्याने काट्याकुट्यातून तर कधी गवतातून मार्ग काढावा लागत आहे. त्यामुळे वस्तीकडे जाणारा रस्ता उभारण्याची मागणी खराडे ग्रामपंचायतीचे सदस्य रुपेश चौधरी तसेच रयत शेतकरी संघटनेचे तालुका अध्यक्ष सचिन विशे यांनी केली आहे.