वसईच्या विद्यार्थ्यांची विधान भवनात संसदीय सैर
आमदार स्नेहा दुबे पंडित यांचा पुढाकार
विरार, ता. १० (बातमीदार) ः वसई विधानसभा मतदारसंघातील विविध जिल्हा परिषद शाळांतील विद्यार्थ्यांना संसदीय प्रक्रियेचे थेट प्रात्यक्षिक अनुभवता यावे, यासाठी पावसाळी अधिवेशन २०२५च्या निमित्ताने एक प्रेरणादायी उपक्रम आयोजित करण्यात आला. वसईच्या आमदार स्नेहा दुबे पंडित यांनी विशेष पुढाकार घेत पाचवी ते सातवीतील ५० विद्यार्थ्यांना विधान भवन भेटीची संधी उपलब्ध करून दिली.
या भेटीत विद्यार्थ्यांना मुख्यमंत्री देवेंद्र फडणवीस यांची विशेष भेट घडवून आणण्यात आली. मुख्यमंत्र्यांनी विद्यार्थ्यांशी संवाद साधत त्यांना शैक्षणिक जीवन आणि अभ्यासाबाबत प्रेरणा दिल्या. विद्यार्थ्यांनी विधानसभेच्या अधिवेशनातील प्रत्यक्ष कामकाज पाहिले, सभागृहातील प्रक्रिया समजून घेतली आणि संपूर्ण विधान भवन परिसराची सैर करीत लोकशाही व्यवस्थेचे शिक्षण घेतले. या उपक्रमामुळे विद्यार्थ्यांच्या मनामध्ये शिक्षण, संसदीय प्रक्रिया आणि नेतृत्व याबद्दल नवे मूल्यबिंदू तयार झाले. या प्रेरणादायी उपक्रमात स्नेहा दुबे पंडित, शाळांतील शिक्षक-शिक्षिका, सहकारी आणि विद्यार्थी मोठ्या उत्साहाने सहभागी झाले होते. या वेळी जिल्हा परिषद शाळा व पंचायत समिती वसई शिक्षक सखाराम भुमकर, अमोल साळुंखे, होनाजी मेस्त्री, अमृता सावे, रूपा बुरकुल, बीजेंद्र कुमार, अक्षय ठाकूर आणि सहकारी उपस्थित होते.