राष्ट्रवादीच्या बालेकिल्ल्यात शिवसेनेचा झंझावात
आदिवासी, मराठा बांधवांचा गोगावले यांच्या मार्गदर्शनाखाली प्रवेश
तळा, ता. ११ (बातमीदार) ः निवडणुकीच्या तोंडावर रायगड जिल्ह्यात राजकीय वातावरण तापलेले आहे. रायगडचे खासदार सुनील तटकरे आणि राज्याचे फलोत्पादन खारभूमी विकास मंत्री भरत गोगावले यांच्यात पालकमंत्रिपदावरून मोठा संघर्ष सुरू आहे. यामध्ये गोगावले यांनी तटकरेंच्या बालेकिल्ल्यात पक्षप्रवेशाचा धडाका सुरू केला आहे. धाटाव येथे पक्षप्रवेश घेतल्यानंतर १० सप्टेंबर रोजी गणेश मंगल कार्यालय येथे तळा तालुक्यातील खांबवली आदिवासी वाडी आणि रहाटाड येथील मराठा, बुरुड बांधवांनी भरत गोगावले यांच्या उपस्थितीत शिवसेनेत जाहीर प्रवेश केला.
नामदार भरत गोगावले यांनी पक्षप्रवेश करणाऱ्या सर्वांचे भगवी शाल घालून शिवसेना शिंदे पक्षात स्वागत केले. या वेळी ते म्हणाले की, आम्ही शिवाजी महाराजांचे मावळे म्हणून काम करतो. बाळासाहेबांच्या मुशीत तयार झालेले हे सर्व शिवसैनिक आहेत. गरिबी आणि श्रीमंती आम्ही फार जवळून पाहिली आहे. शून्यातून आम्ही येथपर्यंत आलोय. एका सामान्य शेतकऱ्याच्या मुलाला चार वेळा निवडून दिले आणि आज मी मंत्री म्हणून तुमच्या समोर उभा आहे. खूप मोठे व्हा, पण जमिनीवरून चाला, जो‌ जमिनीवरून चालेल तो जास्त दिवस टिकेल. जो हवेत राहील त्याचा जय महाराष्ट्र होईल. असे बरेचसे मी मी म्हणणाऱ्यांचा जय महाराष्ट्र झालेला आहे. तुमच्या आशीर्वादाने लवकरच पालकमंत्री होणार असल्याचे त्यांनी या वेळी सांगितले.
............