सुरेश वाघमारे रिपब्लिकन सेनेत
कांदिवली, ता. १३ (बातमीदार) : उत्तर मुंबई जिल्ह्यातील मालाड विधानसभेत राहणारे युवा तरुण आंदोलक सुरेश शिवाजी वाघमारे यांनी आझाद समाज पार्टीमधून रिपब्लिकन सेनेत नुकताच पक्षप्रवेश केला. डॉ. बाबासाहेब आंबेडकर यांचे नातू आनंदराज आंबेडकर यांनी वाघमारे यांचे स्वागत केले. वाघमारे यांच्यावर उत्तर मुंबई जिल्हाप्रमुख पदाची जबाबदारी सोपवली. सुरेश वाघमारे हे चंद्रशेखर आझाद यांच्या नेतृवावर प्रभावित होऊन भीम आर्मी, आझाद समाज पक्षात उत्तर मुंबई जिल्हा अध्यक्ष पदावर काम करीत होते; मात्र पक्षातील गटबाजीला कंटाळून आनंदराज आंबेडकर यांच्या रिपब्लिकन पक्षात जाहीर पक्षप्रवेश केला. वाघमारे यांनी यापूर्वी रिपब्लिकन सेनेत उत्तर मुंबई जिल्हा अध्यक्ष पदावर सलग सहा वर्षे काम केले असून, उत्तर मुंबई जिल्ह्यात मोर्चे, आंदोलन करून सामाजिक राजकीय समस्या सोडविण्यासाठी अविरत कार्य केले आहे. यापुढेही लोकहिताचे कार्य करणार असल्याचे मत सुरेश वाघमारे यांनी दादर येथील आंबेडकर भवन येथे बोलताना व्यक्त केले.