नांदेड : कंधार तालुक्यातून (Kandahar Taluka) एक ह्रदयद्रावक घटना समोर आलीये. बाळंतपणासाठी मुलीला माहेरी आणताना दुचाकीचा अपघात झाला आणि या अपघातात बाप-लेकीसह गर्भातील बाळाचा दुर्दैवी मृत्यू झाला आहे.(Nanded News)

सोमासवाडीमधील (Kandahar Taluka) रहिवासी असलेले बालाजी किशनराव रासवते (वय 40 वर्ष) हे मुलीला बाळंतपणासाठी उदगीरला आणण्यासाठी गेले होते. उदगीरहून परत येत असताना राष्ट्रीय महामार्ग (National Highway) क्रमांक 50 वर असलेल्या पाटोदा खुर्द वळणाच्या ठिकाणी दुचाकी क्रमांक एमएच 25, ए वाय 8226 चा अपघात होऊन बाप-लेकीचा जागीच मृत्यू झाला.

बालाजी रासवतेंची द्वितीय कन्या राजश्रीचा नांदेडच्या तामसा तालुक्यातील राजेश श्रीमंगले या युवकाशी गेल्या वर्षी विवाह झाला होता. नोकरीच्या निमित्तानं राजेश श्रीमंगले हे आपल्या पत्नीला म्हणजे राजश्रीला घेऊन उदगीर इथं राहत होते. राजश्री ही सात महिन्याची गरोदर असल्यामुळं आपल्या मुलीला आणण्यासाठी बालाजी रासवते सोमवारी उदगीरला गेले.

मात्र, बुधवारी रात्रीच्या वेळी मुलीला परत आणत असताना कंधार तालुक्यातील पाटोदा खुर्द राष्ट्रीय महामार्गावर असलेल्या रस्त्या लगतच्या खोल खड्ड्यात कोसळल्यामुळं बाप-लेकीचा आणि पोटातील बाळाचा दुर्दैवी मृत्यू झाला. दरम्यान, पोलिसांनी पंचनामा करून दोन्ही मृतदेह शवविच्छेदनासाठी जळकोट ग्रामीण रुग्णालयात दाखल केले.