नगर/अंमळनेर : नगरच्या कोतवालीतील पोलिस निरीक्षकांच्या प्रेमापोटी केडगावच्या महिलेने जळगावात जाऊन राडा केला. त्यांच्या विरोधातील तक्रार मागे घेतली नाही तर तुला जिवंत ठेवणार नाही, असे धमकावत तिला लाकडी दांडक्याने मारहाण केली. साहेबांसाठी दगंबगिरी करणाऱ्या महिलेविरोधात अंमळनेर पोलिस ठाण्यात गुन्हा दाखल झाला आहे.

याबाबत ज्योती धनराज भोई (रा. पैलाड) यांनी पोलिसात फिर्याद दिली आहे. त्यानुसार, ज्योती भोई शुक्रवारी (ता. 24) सकाळी सहा वाजता घरात झोपलेली असताना, लाकडी दांडके हातात घेऊन महिला तेथे आली. ज्योतीच्या आईला तिने मैत्रीण असल्याचे सांगितले व ज्योतीला पोलिस निरीक्षक विकास वाघ यांची पत्नी असल्याचे सांगितले. मात्र, ज्योती यांनी, "तू त्यांची पत्नी नाही. मी त्यांना एका कार्यक्रमात पाहिले आहे,' असे सांगितले. त्यावर तिने, आपण वाघ यांची प्रेयसी शबनम ऊर्फ शमिना मोमीन (रा. केडगाव, नगर) असल्याचे सांगितले.

हेही वाचा - धंदाच बसलाय साहेब, आता पोटात काय घालायचं, वेश्यालये ओस

"पोलिस निरीक्षक वाघ यांच्याविरुद्ध नाशिकच्या विशेष पोलिस महानिरीक्षकांकडे केलेली तक्रार मागे घे, नाही तर जिवंत मारून टाकीन,' असे सांगून शिवीगाळ केली, तसेच लाथाबुक्‍क्‍यांनी व लाकडी दांडक्‍याने ज्योती यांना मारहाण केली. नंतर दुचाकीवरून (एमएच 16 सीएम 7365) ती निघून गेली. तक्रार मागे घेत नाही तोपर्यंत जाणार नाही, असे सांगून, वारंवार घरी येऊन शिवीगाळ केली, असे फिर्यादीत म्हटले आहे. 
अंमळनेर पोलिसांनी शबनम ऊर्फ शमिना हिच्याविरुद्ध अनधिकाराने दुसऱ्याच्या घरात प्रवेश करणे, अश्‍लील शिवीगाळ, मारहाण, जिल्हाबंदी कायद्याचे उल्लंघन केल्याप्रकरणी गुन्हा दाखल केला आहे.