कोल्हापूर : खुनाच्या गुन्ह्यातील संशयितांनी कारागृहातून रिलसाठी एक व्हिडिओ बनवला. तो व्हिडिओ सोशल मीडियावर वेगाने प्रसारित झाला. त्यामुळे पुन्हा एकदा कारागृहात मोबाईल गेला कसा, व्हिडिओ कोणी बनवला, याची चर्चा सुरू झाली.

हा व्हिडिओ नेमका कळंबा कारागृहातील (Kalamba Jail) की बिंदू चौक उपकारागृहातील आहे, याचा तपास पोलिस करत आहेत. नेहमीच सुरक्षेच्या कारणावरून चर्चेत असणारे कार प्रशासन पुन्हा एकदा टिकेचे लक्ष झाले आहे. राजेंद्रनगरमधील गुंड कुमार गायकवाड याचा गेल्यावर्षी खून झाला. या खुनातील संशयितांनी एक व्हिडिओ सोशल मीडियावर व्हायरल केला.

व्हिडिओमध्ये अमर माने हा प्रमुख संशयित दिसत आहे. व्हिडिओदेखील त्याच्या इंन्स्टाग्राम अकौंटवरून प्रसिद्ध झाला असून, तो एक लाखापेक्षा अधिकजणांनी पाहिला आहे. या व्हिडिओमधून त्यांनी चिथावणीखोर संदेश प्रसारित केला आहे. हा व्हिडिओ कळंबा कारागृहातील आहे की बिंदू चौक (Bindu Chowk Kolhapur) सबजेलमधील आहे, याचा तपास जुना राजवाडा पोलिसांनी सुरू केला आहेत.

राजेंद्रनगरमध्ये सोशल मीडियावरून वाद

कुमार गायकवाड याच्या मृत्यूनंतरही त्याच्या साथीदारांकडून सोशल मीडियावरून संदेश प्रसारित होत आहेत. त्याला प्रत्युत्तर म्हणून विरोधी गटाकडूनही असेच संदेश पसरवले जात आहेत. पोलिसांनी वेळीच लक्ष दिले नाही, तर ही भविष्यातील मोठ्या वादाची नांदी ठरेल.