कोल्हापूर : शेंडा पार्कातील (Shenda Park Kolhapur) ३० एकरांत एक हजार कोटी खर्चाच्या ११०० खाटांच्या सर्व सोयी आणि सेवा-सुविधायुक्त अद्ययावत रुग्णालय होत आहे. या रुग्णालयाच्या कामाला स्वतंत्र प्रशासकीय मान्यता मिळाल्याची माहिती वैद्यकीय शिक्षणमंत्री तथा पालकमंत्री हसन मुश्रीफ (Hasan Mushrif) यांनी येथे दिली.

रुग्णसेवा माझा जिव्हाळ्याचा विषय आहे. जिल्ह्यातील अत्याधुनिक आरोग्यसंकुल ही माझ्या आयुष्यातील सर्वोच्च समाधानाची बाब असल्याचेही ते म्हणाले. या अद्ययावत संकुलामध्ये ६०० खाटांचे सामान्य रुग्णालय व बाह्य रुग्ण विभाग, २५० खाटांचे कर्करोग रुग्णालय आणि २५० खाटांचे सुपर स्पेशलिटी हॉस्पिटल होणार आहे.

केंद्रीय गृहमंत्री अमित शहा (Amit Shah) यांच्या हस्ते लवकरच या कामाचे भूमिपूजन होणार आहे. दरम्यान; छत्रपती प्रमिलाराजे रुग्णालयातील अत्यावश्यक सोयी -सुविधा, अंतर्गत रस्ते आणि सांडपाणी व्यवस्थेसाठी ४४ कोटींचा निधी मंजूर झाल्याची माहिती मुश्रीफ यांनी दिली.

ते म्हणाले, ‘शेंडा पार्क येथे होत असलेल्या राजर्षी शाहू महाराज शासकीय वैद्यकीय महाविद्यालयासाठी जागा आणि संपूर्ण परिसर विकसित करण्याचे काम वैद्यकीय शिक्षण विभागाने युद्धपातळीवर हाती घेतलेले आहे. शासन स्तरावरील ४५१ कोटींच्या तिन्ही स्वतंत्र प्रशासकीय मान्यता नुकत्याच मिळाल्या आहेत. सात मोड्युलर ऑपरेशन थिएटर, सीएसएसडी, इमारतींची आणि अंतर्गत रस्त्यांची देखभाल-दुरुस्ती यांच्यासाठीही ७३ कोटींची प्रशासकीय मान्यता मिळाली आहे.’

या शासकीय वैद्यकीय महाविद्यालय आवारातील ऑडिटोरियम हॉल, नवीन परीक्षा भवन, मध्यवर्ती ग्रंथालय इमारत, शवविच्छेदन गृह, मुलींचे वसतिगृह अशा पाच इमारती ५८ कोटी निधीतून पूर्णत्वाला आलेल्या आहेत. या कामांचा लोकार्पण सोहळाही होणार असल्याचे त्यांनी सांगितले.

दृष्टिक्षेपात नवे रुग्णालय

• - एकूण ३० एकरांत ११०० खाटांचे रुग्णालय

• - न्यायवैद्यक शास्त्राची स्वतंत्र इमारत

• - २५० क्षमतेचे निवासी डॉक्टर व आंतरवासितांसाठी वसतिगृह

• - २५० क्षमतेचे महिला वसतिगृह

• - १५० क्षमतेचे मुलींचे वसतिगृह

• - १५० क्षमतेचे मुलांचे वसतिगृह

• - परिचारिका प्रशिक्षण केंद्र इमारत

• - सेंट्रल लायब्ररी

• - ४०० क्षमतेचे परीक्षा भवन