राशिवडे बुद्रुक : भोगावती साखर कारखान्याच्या (Bhogavati Sugar Factory) अध्यक्षपदी काँग्रेसचे प्रा. शिवाजीराव आनंदराव पाटील (देवाळे) व उपाध्यक्षपदी राष्ट्रवादीचे राजाराम शंकर कवडे (आवळी बुद्रुक) यांची बिनविरोध निवड झाली. काल (शुक्रवार) दुपारी एक वाजता झालेल्या संचालक मंडळाच्या बैठकीत निवडणूक निर्णय अधिकारी नीलकंठ करे याच्या अध्यक्षतेखाली ही निवड प्रक्रिया पार पडली.

नुकत्याच झालेल्या भोगावती कारखान्याच्या पंचवार्षिक निवडणुकीमध्ये आमदार पी. एन. पाटील यांच्या नेतृत्वाखालील आघाडीने २५ पैकी २४ जागा मोठ्या फरकाने जिंकल्या. शुक्रवारी अध्यक्ष -उपाध्यक्ष निवडीबाबत संचालक मंडळाची बैठक झाली. तत्पूर्वी काल रात्री सर्व संचालकांना एकत्रित बोलवून आमदार पी. एन. पाटील, शेकापचे क्रांतिसिंह पाटील व राष्ट्रवादीचे जिल्हाध्यक्ष ए. वाय. पाटील यांनी निवडीबाबत चर्चा केली.

यामध्ये भीमराव अमृता पाटील, शिवाजीराव पाटील व सुनील खराडे यांच्या नावाची चर्चा झाल्यानंतर एक नाव आमदार पाटील यांनी आज सकाळी लखोट्यातून संचालक मंडळाला दिले. प्रारंभी भीमराव पाटील यांची नियुक्ती होईल, असे वाटत असतानाच आलेल्या लखोट्यामधून शिवाजीराव पाटील यांची अध्यक्षपदी वर्णी लागल्याचे स्पष्ट झाले. तर उपाध्यक्षपद राधानगरी तालुक्यात राष्ट्रवादी काँग्रेसला देत असतानाच या पक्षाचे ज्येष्ठ संचालक अविनाश पाटील यांना संधी मिळेल, अशी अपेक्षा होती.

मात्र, राजाराम कवडे यांचे नाव ए. वाय. पाटील यांच्याकडून पुढे आले. आगामी विधानसभा निवडणुकीच्या दृष्टिकोनातून भोगावती कारखान्याचे अध्यक्षपद ‘करवीर’ मध्येच ठेवले आहे. यानुसार शिवाजीराव पाटील यांचा विचार झाला. तर राधानगरीतील आपले वर्चस्व कायम ठेवण्यासाठी ए. वाय. पाटील यांनी श्री. कवडे यांना संधी दिली. निवडीनंतर अध्यक्ष श्री. पाटील यांनी कारखाना ऊर्जितावस्थेत आणण्यासाठी सर्वही २५ संचालक एकसंध राहून कारभार करू. यासाठी कामगार आणि सभासदांनीही सहकार्य करावे आणि जास्तीत जास्त गाळप करून कारखाना सुस्थितीत आणण्यासाठी मदत करावी, असे आवाहन केले.

याप्रसंगी उपाध्यक्ष कवडे यांचेही भाषण झाले. या वेळी सर्व संचालकांसह कार्यकारी संचालक संजय पाटील, सेक्रेटरी उदय मोरे उपस्थित होते. सूत्रसंचालन जनसंपर्क अधिकारी आर. डी. पाटील यांनी केले. निवडीनंतर अध्यक्ष-उपाध्यक्षांनी कारखाना स्थळावरील दिवंगत दादासाहेब पाटील (कौलवकर) यांच्या पुतळ्याला पुष्पहार अर्पण केला. येथून अध्यक्ष पाटील यांच्या कार्यकर्त्यांनी देवाळेपर्यंत मिरवणूक काढली. तर उपाध्यक्ष कवडे यांची मिरवणूक आवळीकडे रवाना झाली.