पन्हाळा : पत्नी (Wife) माहेरी गेल्याच्या निराशेतून यवलूज (ता. पन्हाळा) येथे सोमवारी पहाटे संतोष सखाराम जाधव (वय ३२) या तरुणाने घराच्या भिंतीलगत असलेल्या छताच्या लोखंडी अँगलला दोरीच्या साहाय्याने गळफास घेऊन आत्महत्या केली.

या घटनेची नोंद पन्हाळा पोलिसांत (Panhala Police) झाली आहे. याबाबत पोलिसांतून मिळालेली माहिती अशी, संतोष जाधव याची पत्नी अनेक दिवसांपासून माहेरी राहत होती. त्यामुळे संतोषला नैराश्य आले होते. त्यातच त्याला दारूचे व्यसन लागले होते. चार वर्षांपूर्वी त्याच्या वडिलांचे निधन झाले आहे. सध्या तो आईसोबत राहत होता.

मोलमजुरी करून कुटुंबाचा उदरनिर्वाह चालवत होता. रविवारी संतोष गल्लीतील मंडळाच्या कार्यकर्त्यांसमवेत गणपती विसर्जन मिरवणुकीत सहभागी झाला होता. मिरवणूक संपल्यानंतर तो घरी जाऊन झोपला. पहाटेच्या सुमारास त्याने आत्महत्या केली. त्याच्या मागे आई, पत्नी आणि दोन विवाहित बहिणी असा परिवार आहे.