कामेरी : चहाची तलप..... भारी! विलगिकरणातील पॉझिटिव्ह (covid-19 positive) रुग्ण गेला चहा पिण्यासाठी एकाच्या घरी...असा पॉझिटिव्ह रुग्णांचा वावर कामेरी गावातील (kameri) रस्त्यावर होवू लागला आहे. त्यामुळे ग्रामस्थांत भीतीचे वातावरण आहे. कोरोनाची एवढी दशहत असताना या रुग्णांना (corona patients) त्यांचे काहीच गांभीर्य नाही. आत्तापर्यंत सहा जणांनी प्राण गमावले आहेत. दुसऱ्या लाटेतील जवळजवळ ९० च्यावर रुग्ण अॅक्टिव आहेत. या वाढलेल्या रुग्ण संख्येमुळे गावात काही रुग्ण होम क्वारंटाईन (home quarantine) केले आहेत.

काहींना येथील जिल्हा परिषद शाळेतील विलगिकरण कक्षात ठेवण्यात आले आहे. या विलगीकरण कक्षातील एक रुग्ण आठ दिवसांपूर्वी चहाची तलप झाली म्हणून चक्क क्वारंटाईन कक्षातून ५०० मीटर असणाऱ्या एकाच्या घरी चहा पिण्यासाठी गेला होता. मात्र तो पॉझिटिव्ह असल्याने त्याला तेथे अटकाव करण्यात आला. तर एक रुग्ण चार दिवसांपूर्वी डोके दुखू लागल्याने मेडिकलमध्ये औषधी खरेदीसाठी गेला. होम क्वारटांईन असलेला एकजण आज किराणा माल खरेदीसाठी गेला होता. तर काही होम क्वारटांईन रुग्ण रस्त्यावर फिरत आहेत. यासांठी कोरोना समिती कार्यरत आहे, मात्र या सर्व सदस्यांना मोठी डोकेदुखी झाली आहे. वाढलेल्या रुग्ण संख्येमुळे ग्रामस्थांच्या भितीचे वातावरण पसरले आहे. तरी गावे पोलिस बंदोबस्त ठेवावा अशी मागणी ग्रामस्थांतून होत आहे.