सातारा - जाहीर माफी....आपल्या विभागातून आमच्या उमेदवारास कमी मतदान झाल्यामुळे आपल्या विभागासाठी फंड आलेला नाही...असा फलक सातारा शहरालगतच्या जगतापवाडी येथील एका रस्त्यावर लावले आहेत. हे फलक कोणी लावलेत हे गुलदस्त्यात असले, तरी राजकारणी व्यक्ती मतदारांवर राग कशा प्रकारे व्यक्त करू शकते, याची ही सातारी तऱ्हा पाहायला मिळते; पण या फलकांची चर्चा सध्या चांगलीच रंगली आहे.

निवडणुकीत कोणत्या ठिकाणाहून कोणाला किती मतदान झाले याचे आकडे इलेक्‍ट्रॉनिक्‍स मतदान यंत्रे आल्यापासून सहजरीत्या मिळतात. याची माहिती निवडून आलेल्या उमेदवारांसह पराभूत उमेदवारही घेऊन कोणत्या ठिकाणाहून आपल्याला चांगले मतदान झाले. कोणी मतदान केले नाही, हे ही समजू शकते.

यातूनच सातारा शहरालगतचा त्रिशंकू भाग असलेल्या जगतापवाडी येथील एका रस्त्यावर आपल्या विभागातून आमच्या उमेदवारास कमी मतदान झाल्यामुळे आपल्या विभागासाठी फंड आलेला नाही... असे फलक लावले आहेत. हे फलक कोणी लावलेत हे गुलदस्त्यात असले, तरी सध्या या परिसरात या फलकांची मोठी चर्चा आहे. मुळात हा भाग गोडोली जिल्हा परिषद गट व पंचायत समिती मतदारसंघात येतो.