टेंभुर्णी (सोलापूर) : माढा तालुक्‍यातील शिराळ (टें) येथील संजय मारुती काळे (वय 52) यांचा अज्ञात आरोपींनी शेवरे (ता. माढा) हद्दीतील उजनी कालव्याच्या बाजूस नेऊन अज्ञात कारणासाठी अज्ञात हत्याराने तोंडावर व गळ्यावर वार करून निर्घृण खून केला. मारेकऱ्यांनी अंगावर स्टेफनी ठेवून त्यांचा मृतदेह व टेम्पो जाळून पुरावा नष्ट करण्याचा प्रयत्न केला. ही घटना शनिवारी (ता. 25) रात्री नऊ ते रविवारी (ता. 26) सकाळपर्यंत घडली. याप्रकरणी टेंभुर्णी पोलिस ठाण्यात गुन्हा दाखल झाला आहे. 

हेही वाचा : अगोदर कोरोनाला घालवतो मग राष्ट्रवादीतील नाराजी दूर करतो 

याविषयी पोलिसांकडून समजलेली माहिती अशी, शिराळ (टें) येथील संजय मारुती काळे यांचा खारी, टोस्ट, बेकरी उत्पादने विक्रीचा व्यवसाय होता. ते शनिवारी रात्री नऊ वाजण्याच्या सुमारास जेवण करून झोपण्यासाठी त्यांच्या खोलीत गेले होते. त्यानंतर सकाळी ते घरात नसल्याचे कुटुंबीयांच्या निदर्शनास आले. तसेच त्यांचा मोबाईल बंद होता. शिवाय त्यांचा टेम्पोही (एमएच 45 - 6577) ही घरासमोर दिसला नाही. त्यामुळे त्यांच्या नातेवाइकांनी शोधाशोध सुरू केली. रविवारी सकाळी टेंभुर्णी-अकलूज रस्त्यावरील शेवरे येथे उजनी कालव्याच्या भराव्यानजीक छातीच्या खालचा भाग पूर्णपणे जळालेल्या अवस्थेतील अनोळखी इसमाचा मृतदेह व जळालेल्या स्थितीतील टेम्पो दिसला. मारेकऱ्यांनी तीक्ष्ण हत्याराने त्यांच्या तोंडावर व गळ्यावर वार केले होते. तसेच मृतदेहावर स्टेफनी टाकून जाळण्याचा प्रयत्न केला होता. या मृतदेहाचा छातीचा खालचा संपूर्ण भाग जळून कोळसा झालेला होता व वरील चेहऱ्याचा भाग तेवढा वाचला होता. 

हेही वाचा : मोठी ब्रेकिंग! मुख्यमंत्र्यांना पत्र पाठवून स्वातंत्र्यदिनी मंत्रालयासमोर आत्मदहनाचा "यांनी' दिला इशारा 

दरम्यान, संजय काळे यांची शोधाशोध करीत असताना शेवरे येथे मृतदेह मिळून आल्याची माहिती समजल्याने नातेवाइकांनी तो मृतदेह पाहिला असता, संजय काळे यांचाच तो मृतदेह असल्याचे स्पष्ट झाले. संजय काळे यांचा एवढ्या निर्दयीपणे कोणी व का खून केला हा यक्ष प्रश्न पोलिसांपुढे आहे. दरम्यान, टेंभुर्णी पोलिसांनी घटनास्थळी जाऊन मृतदेह ताब्यात घेऊन तो टेंभुर्णी प्राथमिक आरोग्य केंद्रामध्ये उत्तरीय तपासणीसाठी आणला. त्या वेळी तेथे शिराळ (टें) ग्रामस्थांनी मोठी गर्दी केली होती. 

मृत संजय काळे यांची शिराळ (टें) येथे शेती असून ते पत्नी, दोन मुले व सून यांच्यासह राहात होते. याप्रकरणी आकाश संजय काळे (वय 20) यांनी टेंभुर्णी पोलिीस ठाण्यात फिर्याद दिली आहे. उपविभागीय पोलिस अधिकारी डॉ. विशाल हिरे यांनी घटनास्थळास भेट दिली असून तपासकामी सूचना दिल्या आहेत. या गुन्ह्यातील आरोपींचा छडा लावण्यासाठी सहाय्यक पोलिस निरीक्षक सुशील भोसले व सहाय्यक पोलिस निरीक्षक अमित शितोळे यांच्या नेतृत्वाखाली दोन तपास पथके तयार करण्यात आली असून, जिल्हा पोलिस अधीक्षक मनोज पाटील व अप्पर पोलिस अधीक्षक अतुल झेंडे यांच्या मार्गदर्शनाखाली लवकरच गुन्ह्याचा छडा लावणार असल्याचे टेंभुर्णी पोलिस ठाण्याचे पोलिस निरीक्षक राजकुमार केंद्रे यांनी सांगितले. 

संपादन : श्रीनिवास दुध्याल