सोलापूर : शहरातील एका नामवंत डॉक्‍टरने मिळकत कराच्या थकबाकीपोटी दिलेला धनादेश तीन वेळा बाउन्स झाला. तरीसुद्धा महापालिका कर संकलन विभागातील अधिकाऱ्यांनी त्यांच्याविरुद्ध काहीच कारवाई केली नाही. दरम्यान, वसुली पथकातील कर्मचारी तेजस्विता कासार यांना विडी घरकुल परिसरात एका थकबाकीदाराने दमबाजी करून धमकी दिल्याने खळबळ उडाली आहे. 

हे आधी वाचा - 125 लखपती थकबाकीदार डिजीटलवर

कारवाई नसल्याने धनादेश बाउन्सचे प्रमाण वाढले
वसुली मोहीम सुरू झाल्यापासून आतापर्यंत जवळपास 10 ते 15 लाखांचे धनादेश बाउन्स झाले आहेत. संबंधितांविरुद्ध निगोशिएबल ऍक्‍टनुसार कारवाई करण्यात येईल, असे नियंत्रण अधिकारी तथा मुख्य लेखापाल शिरीष धनवे यांनी सांगितले होते. मात्र एकाहीविरोधात आतापर्यंत तशी कारवाई झाली नाही. आता एक डॉक्‍टरने तीन वेळेला दिलेला धनादेश बाउन्स झाला आहे. मात्र, संबंधिताविरुद्ध कारवाई करण्यात चालढकल केली जात आहे. 20 ते 25 हजारांची थकबाकी असलेल्यांचे नळजोड बंद करणारे महापालिका प्रशासन धनादेश बाउन्सप्रकरणी गप्प का, असा प्रश्‍न उपस्थित होत आहे. 

हेही वाचा - कशामुळे झाले साेलापूरकर असुरक्षित

महिला कर्मचारी असुरक्षित
महापालिकेची करवसुली मोहीम तीव्र करण्यात आली आहे. त्यासाठी खास वसुली पथक नियुक्त करण्यात आले आहे. या पथकामार्फत विडी घरकुल परिसरात वसुली सुरू होती. त्यावेळी थकबाकीपोटी एक गाळा सील करण्याची कार्यवाही सुरू असताना परिसरातील एक युवकाने येऊन सौ. कासार यांना दमबाजी केली, शिवाय "गप्प जा.. नाही तर डोक्‍यात दगड घालीन..' असे म्हणत अंगावर धावूनही गेला. या प्रकाराची माहिती कासार यांनी लगेच सदर बझार पोलिसांना दिली. संबंधित युवकाच्याविरोधात गुन्हा दाखल करण्याची प्रक्रिया सुरू करण्यात आली आहे.

सुखद काही - सावित्रीच्या लेकी झाल्या स्वावलंबी

नगरसेवकाचा हस्तक्षेप
गुन्हा दाखल होऊ नये यासाठी काही नगरसेवक प्रयत्नशील आहेत. तथापि या घटनेमुळे वसुली पथकातील कर्मचाऱ्यांच्या सुरक्षेचा प्रश्‍न निर्माण झाला आहे. महापालिकेच्या अतिक्रमण खात्यासाठी विशेष पोलिस पथकाची नियुक्ती आहे. त्यांचा उपयोग वसुलीसाठी करता येणे शक्‍य आहे, तथापि तशा प्रकारची सुविधा करण्यासाठी वरिष्ठांकडून प्रयत्न होत नसल्याचे दिसून आले आहे.