सोलापूर : गणेशोत्सवाबाबत (Ganeshotsav) राज्य शासनाच्या गृह विभागाने काढलेल्या परिपत्रकाची सोलापूर शहरात (Solapur City) अंमलबजावणी करण्याच्या दृष्टीने महापालिका प्रशासनाने मंगळवारी शहरातील गणेश मूर्तिकारांची बैठक घेतली. या वेळी शासन निर्देशांचे पालन व पर्यावरणपूरक पद्धतीने हा उत्सव साजरा करण्यासंदर्भात प्रशासनाने केलेल्या आवाहनाला मूर्तिकारांनी प्रतिसाद दिला. यंदा 70 टक्के पीओपी तर 30 टक्‍के शाडूच्या (पर्यावरणपूरक) (Eco-Friendly) मूर्ती विकणार, अशी ग्वाही शहर मूर्तिकार असोसिएशनकडून देण्यात आली.

गेल्या वर्षी गणेश उत्सवावर कोरोनाचे विघ्न होते. त्यामुळे मूर्तिकारांचे मोठे नुकसान झाले होते. या वर्षीही तिसऱ्या लाटेची शक्‍यता गृहीत धरून उत्सव निर्विघ्न पार पडावा व नुकसान टाळावे, अशी आशा गणेश मूर्तिकारांमध्ये आहे. गणेश मूर्तिकारांसोबत उत्सवाबाबत उपायुक्त धनराज पांडे यांच्या अध्यक्षतेखाली झालेल्या बैठकीला नगर अभियंता संदीप कारंजे, महापालिकेचे पर्यावरण व्यवस्थापक स्वप्नील सोलनकर यांची प्रमुख उपस्थिती होती. शासन निर्देशानुसार घरगुती "श्रीं'ची मूर्ती दोन तर सार्वजनिक मूर्ती चार फुटांपेक्षा अधिक असू नये, आदी सूचना या वेळी पांडे यांनी केल्या. या वेळी मूर्तिकारांनी गतवर्षी कोरोना आपत्तीमुळे सार्वजनिक गणेश उत्सवावर बंदी असल्याने पीओपीच्या मूर्ती मोठ्या प्रमाणात पडून आहेत. यंदा त्या मूर्ती विकण्यासाठी परवानगी द्यावी, तसेच यंदा शहरात अनेक ठिकाणी स्टॉल्स उभारण्याची सोय करावी, अशी विनंती केली. यावर पांडे यांनी कोरोनासंदर्भात नियमांच्या अधीन राहून प्रशासन योग्य निर्णय घेणार, असे सांगितले.

बैठकीला असोसिएशनचे अध्यक्ष अमरनाथ कनकी, सचिव चंद्रकांत वग्गा, विजय यादव, संतोष गालपल्ली, लक्ष्मण खंडागळे, उमेश सूर्यवंशी, रगेश रायचूरकर, मधुकर कोक्कूल, प्रशांत चलवादी, राजकुमार व्हनकोरे, रूपेश म्याडम, अशोक हिबारे, पांडुरंग कुंभार, अनिल इंगळे, संतोष यमगर, गजेंद्र बांदीवडेकर, राजू गुंडला आदी उपस्थित होते.