कोल्हापूर : महापुराचे संकट गेले आणि आता दुसरे जगभरात कोरोनाचे संकट थैमान घालत आहे. त्यामुळे पश्‍चिम महाराष्ट्रातील सुमारे पंचवीस हजार छायाचित्रकारांवर उपासमारीचे संकट उभे ठाकले आहे. दरम्यान, लग्नसराईचे दिवस असून, लॉकडाऊनमुळे विवाह सोहळ्यांवर बंदी आहे.

कोरोनाच्या पार्श्‍वभूमीवर पश्‍चिम महाराष्ट्रातील चित्र 

लॉकडाऊननंतर विवाहांचे प्रमाण वाढणार असले तरी छायाचित्रकार मिळणे अवघड होणार असल्याचे चित्र आहे. 
कोरोनाच्या जागतिक संकटामुळे लॉकडाऊन जाहीर करण्यात आले आहे. त्यामुळे लग्न समारंभ आणि इतर कार्यक्रम पुढे ढकलण्यात आले आहेत. काही ठिकाणी अगदी साध्या पध्दतीने किंवा ऑनलाईन पध्दतीने सोहळ्यांवर भर दिला गेला आहे.

हेही वाचा- भूतनाथमधील 64 कुटुंबांचा अन्नसुरक्षामध्ये समावेश करण्याची मागणी

पंचवीस हजारांवर छायाचित्रकार अडचणीत 

त्यामुळे सर्वच छायाचित्रकारांना ऑर्डरना मुकावे लागत आहे. बदलत्या जगाबरोबर आपणही अपडेट राहावे म्हणून काही छायाचित्रकारांनी नवीन कॅमेरे आणि अत्याधुनिक मटेरियल बॅंक कर्जे घेऊन खरेदी केले आहेत. मात्र, ऑर्डरच नसल्याने बॅंकेचे हप्तेही थकले आहेत. लॉकडाऊननंतरही अपेक्षित व्यवसाय होईल, याची शाश्‍वती देता येत नाही, असे सध्याचे चित्र आहे. 

हेही वाचा-  विद्यार्थ्याने दिला चित्रकलेतून सोशल डिस्टनिंगचा संदेश

शासनाने एखादी योजना लागू करावी. 
छायाचित्रकारांचा व्यवसाय हा बारमाही नसतो. लग्नसराई व मोठ्या समारंभाच्या ऑर्डरवरच त्यांचा व्यवसाय अवलंबून असतो. त्यामुळे त्यावरच त्याचे वार्षिक आर्थिक नियोजन असते. मात्र, आता विवाह आणि मोठे कार्यक्रमही नाहीत. त्यामुळे छायाचित्रकारांवर उपासमारीची वेळ येणार आहे. राज्य शासनाने अधिकृत छायाचित्रकारांना बॅंकेची सवलत अथवा एखादी योजना लागू करावी. 
- संजीव देवरूखकर, अध्यक्ष, जिल्हा फोटोग्राफर्स असोसिएशन