ऊर्से, ता. ५ : मावळ तालुक्यातील ओवळे गावातील जिल्हा परिषद शाळेत महाराष्ट्रातील पहिल्या ‘हॅन्ड इन हॅन्ड इंडिया’ संस्थेच्या सहकार्याने उभारण्यात आलेल्या एसटीईएम लॅबचे उद्‍घाटन करण्यात आले. अँटोलीन कंपनीच्या सीएसआर सहकार्यातून या लॅबचे काम करण्यात आले आहे.
यावेळी अँटोलिनचे जोईस सॅम्युअल, प्लांट मॅनेजर दत्तात्रय बहिरट यांच्यासह संदीप मुखर्जी, लोकेश गणपती आणि ‘हॅन्ड इन हॅन्ड इंडिया’ संस्थेची महाराष्ट्र टीम उपस्थित होती. मुख्याध्यापक, शिक्षक, शाळा व्यवस्थापन समितीचे अध्यक्ष, सदस्य आणि विद्यार्थ्यांनी कार्यक्रमाचे आयोजन केले होते.
कार्यक्रमाची सुरुवात पारंपरिक लेझीम सादरीकरण आणि स्वागतगीताने झाली. त्यानंतर सरस्वती पूजन व दीपप्रज्वलन करण्यात आले. ही एसटीईएम लॅब पहिली ते सातवीच्या विद्यार्थ्यांसाठी उपयुक्त ठरणार असून विज्ञान, तंत्रज्ञान, अभियांत्रिकी आणि गणित या विषयांचे सर्जनशील व प्रात्यक्षिक स्वरूपात शिक्षण यातून दिले जाणार आहे.
जोईस सॅम्युअल म्हणाले की, ‘‘स्पेनमधील ॲंटोलीन कंपनीचा विश्वास आहे की ग्रामीण भागातील मुलांनाही आधुनिक शिक्षणाची संधी मिळायला हवी.’’
गेल्या आठ वर्षांपासून एचआयएचएल व अँटोलिन या संस्थांचा ओवळे गावाला मोठा पाठिंबा लाभला आहे. या भागातील पहिली ई-लर्निंग शाळाही याच गावात सुरू झाली होती. आता महाराष्ट्रातील पहिली एसटीईएम लॅबही येथेच सुरू करण्यात आली आहे. यावेळी थ्रीडी पेन आणि थ्रीडी प्रिंटर यांचे प्रात्यक्षिकही दाखवले गेले. गावकऱ्यांनी या उपक्रमाचे कौतुक करून त्याच्या यशस्वितेसाठी सहकार्य करण्याची ग्वाही दिली.