लोणावळा, ता. १६ : लोणावळा एज्युकेशन ट्रस्टचे डॉ. बी. एन. पुरंदरे कला, श्रीमती एस. जी. गुप्ता वाणिज्य आणि श्रीमती शारदाबेन अमृतलाल मिठाईवाला विज्ञान महाविद्यालयामध्ये ‘नवे शैक्षणिक धोरण व उच्च शिक्षणामध्ये त्याची अंमलबजावणी’ या विषयावर एक दिवसीय कार्यशाळा संपन्न झाली.
सावित्रीबाई फुले पुणे विद्यापीठ येथील विद्या परिषद सदस्य प्रा. डॉ. संगीता जगताप यांनी नव्या शिक्षण धोरणाची भविष्यामध्ये असलेली गरज त्याचप्रमाणे नव्या शैक्षणिक धोरणाचे स्वरूप आणि त्याची अंमलबजावणी याबाबत सखोल मार्गदर्शन केले.
लोणावळा एज्युकेशन ट्रस्टचे अध्यक्ष रमेशचंद्र नय्यर, सचिव दत्तात्रेय पाळेकर, संस्थेच्या कायदेशीर सल्लागार ॲड. नीलिमा खिरे, व्हीपीएस महाविद्यालयाचे प्राचार्य डॉ. चंद्रशेखर भगत आदी उपस्थित होते. प्रा. रंजू बाला यांनी प्रमुख वक्त्यांची ओळख करून दिली. अध्यक्षीय मनोगत व्यक्त करताना ॲड. खिरे यांनी नवीन शैक्षणिक धोरणात शिक्षकांची भूमिका महत्त्वाची असणार आहे, याकडे सर्वांचे लक्ष वेधले. कार्यक्रमाचे प्रास्ताविक महाविद्यालयाचे प्रभारी प्राचार्य प्रा. दिगंबर दरेकर यांनी तर सूत्रसंचालन प्रा. भक्ती अहीर यांनी केले. डॉ. सुपर्णा मित्रा यांनी आभार मानले.