पिंपरी, ता. १३ : नात्यातील तरुणीशी प्रेमसंबंध असल्याच्या रागातून तरुणाला मारण्यासाठी दहा लाखांची सुपारी दिली. तरुणावर गोळी झाडून जिवे मारण्याचा प्रयत्न केला. हा प्रकार मावळ तालुक्यातील ओझर्डे येथे द्रुतगती मार्गालगत घडला.
विकास बाळासाहेब केदारी (रा. ताजे) असे या गोळीबारात गंभीर जखमी झालेल्या तरुणाचे नाव आहे. त्याच्यावर खासगी रुग्णालयात उपचार सुरू आहेत. तर, अभिजीत संतोष केदारी (वय २६), नितीन ज्ञानदेव केदारी (वय ४२, दोघेही रा. ताजे, ता. मावळ) आणि आकाश भोकसे (वय २६, रा. कुरकुंडी, ता. खेड) यांना अटक करण्यात आली आहे. गोळीबार करणारा आरोपी अद्याप फरार आहे. या प्रकरणी किरण केदारी यांनी शिरगाव पोलिस ठाण्यात फिर्याद दिली आहे.
‘‘विकासला मारण्यासाठी अभिजीत आणि नितीन यांनी आकाश आणि मुख्य आरोपीला सुपारी दिली होती,’’ असे फिर्यादीत म्हटले आहे. या गुन्ह्याचा समांतर तपास गुंडा विरोधी पथक करत होते. पथकाने अभिजित याला रायगड जिल्ह्यातील माथेरान येथून तर नितीन केदारी व आकाश भोकसे याला सातारा जिल्ह्याच्या वाई येथून ताब्यात घेतले. या दोघांवर यापूर्वीही काही गुन्हे दाखल आहेत.