पिंपरी, ता. १२ ः स्वातंत्र्य दिनानिमित्त शहरामधील बाजारपेठांमध्ये उत्साहाचे वातावरण पाहायला मिळत आहे. ठिकठिकाणी तिरंगी टी शर्ट, स्टिकर आणि सजावटीचे साहित्य विक्रीसाठी ठेवले आहे. त्यासह विविध वस्तू खरेदी करण्यासाठी नागरिकांनी मंगळवारी बाजारपेठेत गर्दी केली. महागाईमुळे सर्वच वस्तूंच्या किमतीमध्ये सुमारे २० ते २५ टक्के वाढ झाल्‍याचे विक्रेत्यांनी सांगितले.
स्वातंत्र्य दिनासाठी विविध संस्था, शासकीय कार्यालये, शाळा, महाविद्यालये प्रामुख्याने राष्ट्रध्वजाची खरेदी करत असतात. शुक्रवारी (ता. १५) देशाचा स्वातंत्र्य दिन सर्वत्र साजरा होणार आहे. त्यामुळे लहान मुलांसह नागरिकांमध्ये उत्साह दिसून येत आहे. बाजारपेठेत राष्ट्रध्वज खरेदीला पसंती दिली जात आहे. मागणीनुसार विविध आकारांमध्ये हे ध्वज उपलब्ध आहेत. यंदाच्या बाजारपेठेतील प्रमुख आकर्षण म्हणजे पोशाखावर लावले जाणारे छोटे झेंडे. याशिवाय बाजारात लहान आकारातील कागदी, कापडी व मेटलचे झेंडे उपलब्ध झाले आहेत. वाहन, घरांवर लावण्यासाठी तिरंगी ध्वजासह देशभक्तीपर संदेश देणारे बॅच, टॅटू, ब्रेसलेट, अंगठी, तिरंगी फुगे अशा विविध वस्तूंनी बाजारपेठ सजली आहे.

‘हर घर तिरंगा’ मुळे मागणी
सध्या बाजारात तिरंगा ध्वजांची मागणी वाढली आहे. पंतप्रधान नरेंद्र मोदी यांनी ‘हर घर तिरंगा’ असे आवाहन केल्यामुळे तर तिरंगा ध्वजांची मागणी आणखीनच वाढली आहे. बाजारात किमान दहा रुपयांपासून ते कमाल २२० रुपयांपर्यंतचे कापडी तिरंगी ध्वज विक्रीसाठी उपलब्ध आहेत. अस्सल सुतीच्या पातळ कपड्यापासून बनवलेला हा ध्वज आमच्याकडे फक्त २२० रुपयाला उपलब्ध असल्याचे विक्रेत्यांनी सांगितले.

कोणत्या वस्तूंना मागणी
- विविध आकारांतील झेंडे
- पोशाखावरील कापडी आणि मेटलचे ध्वज
- सुतीच्या तिरंगी साड्या, पांढऱ्या रंगाच्या साडीवर तिरंगी रंगाचे वीणकाम
- तिरंगी बांगड्या, खादीचे कपडे, टोपी, तिरंग्याच्या संकल्पनेवरील जॅकेट्स
- कुर्ता - पायजमा, टी शर्ट, ओढण्या

संचलनाची तयारी जोरात
स्वातंत्र्य दिनानिमित्त शाळेची स्वच्छता, वर्गाची सजावट, विविध साहित्यांची दुरुस्ती, विविध पथकांची संचलनाची तयारी सुरू आहे. अनेक शाळांमध्ये स्वतंत्र दिनाची रंगीत तालीम सुरू आहे. विद्यार्थ्यांबरोबरच शिक्षकही तेवढ्याच उत्साहाने या सर्वांमध्ये सहभागी होतात. स्वातंत्र्य दिनाच्या दिवशी विविध शाळांमधून काढल्या जाणाऱ्या प्रभात फेरीचे सर्वांनाच विशेष आकर्षण असते. पारंपरिक वेशभूषेमध्ये लेझीम, ढोल ताशांसह विद्यार्थी यामध्ये सहभागी होत असतात.

विक्रीस आलेल्या वस्तू (दर रुपयांत)
लहान - मोठे झेंडे १० ते १००
स्टिकर - २० रुपये पॅकेट
अंगठी एक - ८० रुपये
बॅच - १० ते ८०
वाहनांमधील ध्वज - २० ते १००