संदीप सोनार ः सकाळ वृत्तसेवा

काळेवाडी, ता. १० : काळेवाडी पोलिस चौकीमधील पोलिस कर्मचाऱ्यांना जागा अपुरी पडू लागली आहे. त्यामुळे तिचे इतरत्र स्थलांतर करण्याचे प्रयत्न करण्यात आले. मात्र, जागा मिळत नसल्याने पोलिस कर्मचारी आणि सर्वसामान्य तक्रारदार नागरिकांना वेगवेगळ्या अडचणींना सामोरे जावे लागत आहे. दोघांनाही त्यांची वाहने उभी करायला देखील जागाच मिळत नसल्याचे दिसून येत आहे.
काळेवाडीतील पाचपीर चौकाजवळ ही चौकी आहे. पूर्वी पिंपरी पोलिस ठाण्याअंतर्गत ही चौकी येत असे. मात्र, नवीन पिंपरी चिंचवड पोलिस आयुक्तालय आणि पोलिस ठाण्यांची निर्मिती झाल्यावर या चौकीचा काळेवाडी पोलिस ठाण्याच्या कार्यक्षेत्रा अंतर्गत समावेश करण्यात आला. मात्र, चौकीतील कर्मचाऱ्यांना अपुऱ्या मूलभूत सोयी-सुविधांना सामोरे जावे लागत आहे.

काय आहेत गैरसोयी ?
- दुकाने व इतर गजबजलेल्या गर्दीत चौकी हरवलेली दिसते; प्रथमतः नागरिकांच्या नजरेसच येत नाही.
- एका आठ बाय दहाच्या दोन भागांमधील जणू दुकान वजा जुनी कोठडी
- साधारणतः दोन किंवा जास्तीत जास्त तीन कर्मचारी बसू शकतील, एवढीच जागा
- प्रवेशद्वारजवळच स्वच्छतागृह, त्यावरील पाण्याची टाकी अनेक वर्षे अस्वच्छ
- पाणी पिण्यासाठी व्यवस्था व पुरेसा प्रकाशाची वानवा
- महिलांसाठी सुरक्षित वाटेल अशा वातावरणाचा अभाव

नूतनीकरणापेक्षा स्थलांतर गरजेचे
चौकीचे नूतनीकरण करण्यापेक्षा स्थलांतर होणे गरजेचे असल्याचे मुख्यत्वे दिसून येत आहे. चौकीच्या बाहेर मुख्य काळेवाडी - पिंपरी रस्ता असल्याने या ठिकाणाहून प्रचंड रहदारी असते. काळेवाडीतील मोठी लोकसंख्या पाहता व गुन्ह्याचे प्रमाण बघता काळेवाडी पोलिस चौकीचे विस्तारीकरण व विकास होणे गरजेचे असून यासाठी पोलिस प्रशासनाने त्याकडे लक्ष द्यावे, अशी मागणी नागरिकांनी केली आहे.

काळेवाडी पोलिस चौकी इतरत्र हलविण्यासंदर्भात याआधी अनेक प्रयत्न झाले. परंतु त्यासाठी आवश्यक जागा व ठिकाण मिळत नसल्याने अडचण येत आहे. यापूर्वी रहाटणी येथे एक जागा निश्चित करण्यात आली होती. परंतु जागेच्या कायदेशीर बाबींमुळे ती जागा निश्चित करण्यात आली नाही. नवीन जागेसाठी आयुक्तालयाकडे पाठपुरावा केला जाईल.
- राजेंद्र बहिरट, वरिष्ठ पोलिस निरीक्षक, काळेवाडी पोलिस ठाणे

SVW25A00043
SVW25A00043