Hardik Joshi and Akshaya Deodhar | हार्दिक जोशी आणि अक्षया देवधर यांचा चाहतावर्ग मोठा आहे. ‘झी मराठी’ वाहिनीवरील ‘तुझ्यात जीव रंगला’ या मालिकेमुळे ही जोडी घराघरांत लोकप्रिय आहे. या मालिकेत हार्दिकने राणादा; तर अक्षयाने अंजली पाठक ही भूमिका साकारली होती.

मालिकेने प्रेक्षकांचा निरोप घेतला असला, तरी आजही ही जोडी लोकप्रिय आहे. हार्दिक आणि अक्षयाने मालिका संपल्यावर वैयक्तिक आयुष्यात लग्नगाठ बांधली. हे दोघेही अनेक ठिकाणी फिरायला जात असतात.

एवढेच नव्हे, तर ही जोडी देवदर्शनालासुद्धा जाते. काही दिवसांपूर्वीच हार्दिक-अक्षया सप्तश्रृंगी गडावर देवदर्शनासाठी गेले होते. आता ते अक्कलकोटला पोहोचले आहेत. तिथे त्यांनी स्वामी समर्थांच्या मंदिरात दर्शन घेतलं.

राणादाने या मंदिर परिसरातील फोटो इन्स्टाग्रामवर शेअर करून ‘श्री स्वामी समर्थ अक्कलकोट दर्शन’ असं कॅप्शन दिलं आहे. या दोघांच्या फोटोवर नेटकऱ्यांनीदेखील कौतुकाचा वर्षाव केला आहे. दरम्यान, मालिकेच्या सेटवर चांगली मैत्री झाल्यावर खऱ्या आयुष्यात राणादाने पाठकबाईंच्या थेट घरी जाऊन लग्नाची मागणी घातली होती.

त्यानंतर गुपचूप साखरपुडा उरकत या जोडप्याने सर्वांना आश्चर्याचा धक्का दिला होता. पुढे, हार्दिक-अक्षयाने डिसेंबर २०२२ मध्ये लग्नगाठ बांधली. दोघांच्या लग्नाला मनोरंजनविश्वातील बरेच कलाकार उपस्थित राहिले होते.