Hardik Joshi: राणादा 'या' मालिकेत करणार धमाकेदार एन्ट्री; 'जाऊ बाई गावात'नंतर दिसणार नव्या भूमिकेत!

Tuzech Mi Geet Gaat Aahe: छोट्या पडद्यावरील ‘तुझेच मी गीत गात आहे’ (Tuzech Mi Geet Gaat Aahe) या मालिकेचं कथानक सध्या अतिशय उत्कंठावर्धक वळणावर येऊन पोहोचलं आहे. एकीकडे वैदेहीच्या मृत्यूला मोनिकाच जबाबदार असल्याचं सत्य सर्वांसमोर उघड होणार आहे. तर दुसरीकडे मोनिकासाठी सनी नावाच्या व्यक्तीने लिहिलेली प्रेमपत्र मल्हारच्या हाती लागणार आहेत. त्यामुळे मल्हार आणि मोनिकाच्या नात्यात तणाव निर्माण झाला आहे. अशातच आता अभिनेता हार्दिक जोशीची (Hardeek Joshi) एन्ट्री ‘तुझेच मी गीत गात आहे’ या मालिकेत होणार आहे.

शुभंकरच्या एन्ट्रीनं मालिकेत येणार ट्वीस्ट

मल्हार-मोनिकाचं नातं निर्णायक वळणावर असताना मालिकेत पुन्हा एकदा अभिनेता हार्दिक जोशीची म्हणजेच शुभंकरची एन्ट्री होणार आहे. मोनिकाला प्रेमपत्र लिहिणारा सनी म्हणजे स्वत: शुभंकर असल्याचा खुलासा तो करणार आहे. त्यामुळे शुभंकरच्या रुपात मोनिकाच्या आयुष्यात पुन्हा नवं वादळ आलं आहे. अडचणीच्या या परिस्थितीतून मोनिका कसा मार्ग काढणार? मल्हार मोनिकाला माफ करणार का? काय असेल मल्हार-मोनिकाच्या नात्याचं भविष्य हे मालिकेच्या पुढील भागांमधून उलगडेल.

हार्दिक हा गेल्या काही महिन्यांपासून 'जाऊ बाई गावात' या कार्यक्रमामधून प्रेक्षकांच्या भेटीला येत आहे. या कार्यक्रमाचे हार्दिक सूत्रसंचालन करत होता. अशताच आता तो ‘तुझेच मी गीत गात आहे’ या मालिकेत पुन्हा एन्ट्री करत असल्यानं त्याच्या चाहत्यांना आनंद झाला आहे.

हार्दिकनं 'या' मालिकांमध्ये केलं काम

हार्दिक जोशीला तुझ्यात जीव रंगला या मालिकेमुळे विशेष लोकप्रियता मिळाली आहे. या मालिकेत तो राणादा ही भूमिका साकारत होता. हार्दिकनं तुझ्या माझ्या संसाराला आणि काय हवं, अघोरी,दुर्व, राजा शिवछत्रपती या मालिकांमध्ये देखील हार्दिकनं काम केलं आहे. आता हार्दिकला ‘तुझेच मी गीत गात आहे’ या मालिकेत बघायला प्रेक्षक उत्सुक आहेत.