काही दिवसांपुर्वी हत्या झालेला कुख्यात गुंड शरद मोहोळ याच्या पत्नीला धमकवणारा आरोपी ससून रुग्णालयातून पळाल्याचा धक्कादायक प्रकार समोर आला आहे. ससून रूग्णालयातून पोलिसांना गुंगारा देत पळ काढल्याने पुणे शहर पोलीस दलात खळबळ उडाली. (Pune Crime News)

मार्शल लुईस लीलाकर असे या फरार आरोपीचं नाव आहे. दोन दिवसांपूर्वी पुणे पोलिसांनी याला अटक केली होती. सोशल मिडीयावरून रील्स आणि कमेंट करून शरद मोहोळ याची पत्नी स्वाती मोहोळ यांना धमकवल्या प्रकरणी लीलाकारला अटक करण्यात आली होती.

येरवडा जेलमधून प्रकृती खराब असल्याच्या कारणाने त्याला ससून हॉस्पिटलमध्ये उपचारासाठी आणण्यात आलं होतं. यावेळी मार्शल लुईस लीलाकर याने पोलिसांना गुंगारा देत पळ काढला आहे. .फरार असलेल्या लीलाकरचा शोध घेण्यासाठी पुणे पोलिसांनी 8 पथके पाठवली असून त्याचा पोलीस त्याचा शोध घेत आहे.

याबाबत स्वाती मोहोळ यांनी पोलिस आयुक्त अमितेश कुमार यांची भेट घेऊन हा प्रकार सांगितला होता. त्यानंतर पोलिसांनी आरोपी लीलाकरला काल अटक केली होती.

या प्रकरणाचा तपास सायबर पोलिसांकडून करण्यात येत होता. तो सध्या सायबर पोलिसांच्या ताब्यात होता. त्याला रात्री लॉकअपमध्ये ठेवले होते. लीलाधरने त्याला सकाळी छातीत दुखत असून, अस्वस्थ वाटत असल्याची तक्रार पोलिसांकडे केली. त्यामुळे सायबर पोलिसांचे पथक त्याला आज सकाळी आठ वाजण्याच्या सुमारास वैद्यकीय तपासणीसाठी ससून रुग्णालयात घेऊन आले होते. त्यावेळी ओपीडीमध्ये उपचारादरम्यान पोलिसांना गुंगारा देऊन त्याने पलायन केले.

काही दिवसांपूर्वीच अमली पदार्थ तस्कर प्रकरणातील ललित पाटील ससून रुग्णालयातून पसार झाल्याची घटना घडली होती. त्यानंतर पुन्हा ससूनमधून आरोपीने पलायन केल्यामुळे पोलिसांकडून हलगर्जीपणा होत असल्याचे समोर आले आहे.

दरम्यान, याबाबत बंडगार्डन पोलिस ठाण्यात गुन्हा दाखल करण्याची प्रक्रिया सुरू आहे. पलायन केलेल्या आरोपीचा पोलिस शोध घेत आहेत. त्यासाठी स्थानिक पोलिस आणि गुन्हे शाखेच्या पोलिसांचे पथक तयार करण्यात आले आहे, असे आर्थिक व सायबर गुन्हे शाखेचे पोलिस उपायुक्त विक्रांत देशमुख यांनी सांगितले.