पुणे : मोकाअंतर्गत अटकेत असलेल्या रवींद्र बऱ्हाटे याला औरंगाबाद कारागृहातून येरवडा कारागृहामध्ये हलविण्याबाबतचा अर्ज विशेष मोका न्यायाधीश एस. आर. नावंदर यांनी फेटाळला आहे. त्यामुळे बऱ्हाटे याचा मुक्काम हा औरंगाबाद कारागृहात राहणार आहे.

खंडणी, धमकाविणे, बेकायदा सावकारी आणि आर्थिक फसवणूक अशा गुन्ह्यांत बऱ्हाटेला अटक करण्यात आली आहे. बऱ्हाटे हा त्याच्या जवळच्या व्यक्तींच्या माध्यमातून तपासात अडथळे निर्माण करू शकतो. त्यामुळे त्याला औरंगाबाद कारागृहातील कोठडीत ठेवण्यात आले आहे. मात्र त्याने तेथून येरवडा कारागृहात हलविण्याचा अर्ज न्यायालयात केला होता.

ससून रुग्णालयामध्ये हृदयविकार संदर्भात उपचार करायचा आहे. त्यामुळे मला येरवडा कारागृहात पाठविण्यात यावे, अशी मागणी बऱ्हाटे याने अर्जाद्वारे केली होती. या अर्जाला विशेष सरकारी वकील प्रवीण चव्हाण यांनी विरोध केला. बऱ्हाटे याची जानेवारी महिन्यात अ‍ॅन्जिओप्लास्टी झालेली आहे.

त्यामुळे ऑपरेशन करण्यासारखे उपचार तुर्तास बाकी नाहीत. औरंगाबादला हलविण्यापूर्वी त्याची वैद्यकीय तपासणी करण्यात आली असून, डॉक्टरांनी प्रवास करण्यासाठी त्याला कोणती अडचणी नसल्याचे सांगितले आहे. औरंगाबाद येथील घाटी शासकीय रुग्णालयात अद्ययावत सुविधा आहेत. त्यामुळे गरज पडल्यास तेथे त्याच्यावर सर्व प्रकारचे उपचार केले जाऊ शकतात.

आवश्‍यक असेल तर त्याला मुंबर्इ येथील शासकीय रग्णालयात देखील पाठवता येर्इल. त्यामुळे त्याला येरवडा कारागृहात आणण्याची करण्याची गरज नाही. तसेच त्याला येरवडा कारागृहात ठेवल्यास तो काही षडयंत्र करण्याची शक्यता नाकारता येत नाही. त्यामुळे त्याचा अर्ज फेटाळण्यात यावा, असा युक्तिवाद ॲड. चव्हाण यांनी केला. सरकारी पक्षाचा युक्तिवाद ग्राह्य धरत न्यायालयाने बऱ्हाटे याचा अर्ज फेटाळण्यात आला.