पुणे- कोणत्याही परिस्थितीत येत्या 21 मार्चला एमपीएससीची परीक्षा घ्यायलाच हवी नाहीतर मी उपोषणाला बसेन असा इशारा भाजप नेते आमदार गोपीचंद पडळकर यांनी महाविकास आघाडी सरकारला दिला आहे. दि. 14 तारखेच्या परीक्षेसाठी ग्रामीण भागातून हजारो विद्यार्थी शहरात आले आहेत. अनेक विद्यार्थ्यांची आर्थिक स्थिती बेताची आहे. आता परीक्षा 21 तारखेला असल्याने सर्वांना 7 दिवस थांबावे लागणार आहे. त्यामुळे गरजू विद्यार्थ्यांना सरकारने 20 दिवसांचा भत्ता द्यावा, अशी मागणी त्यांनी केली आहे. पुणे येथे प्रसारमाध्यमांच्या प्रतिनिधींशी बोलताना त्यांनी ही मागणी केली. 

दि. 21 मार्चची परीक्षा जर वेळेत झाली नाही तर मुख्यमंत्र्यांच्या वर्षा निवासस्थानासमोर आपण आंदोलन करु असा इशारा त्यांनी यावेळी दिला. परीक्षांबाबत सरकार गंभीर नसल्याचा आरोपही त्यांनी यावेळी केला. एमपीएसीच्या परीक्षेवरुन पडळकर यांनी महाविकास आघाडीवर आरोपांच्या फैऱ्या झाडल्या. 

हेही वाचा- विश्वासघात हा महाविकास आघाडीचा 'किमान समान कार्यक्रम', पडळकरांचा हल्लाबोल

महाविकास आघाडी सरकार हे विश्वासघाताने सत्तेवर आलेले आहे. विश्वासघात हा या सरकारचा किमान समान कार्यक्रम आहे. मराठा आरक्षण, धनगर समाजाचा निधी, वीज बिलाबाबत सरकार विश्वासघात करत आहे. पाचवेळा परीक्षा पुढे ढकलून हे सरकार आता विद्यार्थ्यांशी विश्वासघात करत आहे, असा आरोप त्यांनी यावेळी केला. 

दरम्यान, एमपीएससी आंदोलन प्रकरणी आमदार गोपीचंद पडळकरांविरुद्ध गुन्हा दाखल करण्यात आला आहे. विश्रामबाग पोलीस ठाण्यात कलम 188 प्रमाणे गुन्हा दाखल झाला आहे. पडळकर आणि सहकाऱ्यांना रात्री अटक करून जामिनावर सोडून देण्यात आले.