भिगवण : डिकसळ(ता.इंदापुर) येथील पुलावरुन सोमवारी(ता.२७) सकाळी दहाच्या सुमारास पुण्याच्या दिशेने निघालेल्या कार चालकाचा कारवरील ताबा सुटल्यामुळे कार थेट उजनी धरणाच्या पाण्याच्या फुगवटयांमध्ये गेली. परंतु तेथे असलेल्या मच्छीमार पितापुत्रांनी प्रसंगावधान राखत पाण्यात उडी घेतली. कारमधील चालकाचा प्राण वाचविण्यात मच्छीमारांना यश आले.

याबाबत अधिक माहिती अशी की, करमाळा येथील मोटार कार करमाळ्याहुन पुण्याकडे निघाले होती. डिकसळ (ता.इंदापुर) येथील ब्रिटीशकालीन पुलाच्या जवळ कारवरील चालकांचा ताबा सुटुन कार थेट उजनी धऱणाच्या पाण्यात केली. कार चालकांसह उजनीच्या पाण्यात बुडू लागली.

सुदैवाने त्याच दरम्यान मच्छीमार बापु नगरे व समाधान नगरे हे पिता पुत्र त्या ठिकाणाहुन भिगवणकडे निघाले होते. त्यांनी कार पाण्यामध्ये बुडत असल्याचे पाहिले व प्रसंगावधान राखत थेट पाण्यामध्ये उडी घेऊन कारमधील चालकांचे प्राण वाचविले. कार ही करमाळा येथील असल्याचे समजले परंतु कार चालकाचे नाव समजु शकले नाही.