येरवडा : तुमचे नातेवाईक आणि मित्रमंडळींसोबत वाढदिवस साजरा करायला धावत्या मेट्रो मध्ये परवानगी मिळाली तर काय भन्नाट कल्पना आहे ना. पण हे वास्तवात लवकरच येणार आहे.लहान मुलांच्या वाढदिवस असो कि विवाहाचा वाढदिवस, प्रत्येकाच्या आयुष्यात येणाऱ्या विशेष दिवस साजरा करण्यासाठी मेट्रो स्वागत करणार आहे. हौसेला मोल नाही असे म्हणतात पण अगदी नगण्य शुल्कात पुणेकरांना विविध कार्यक्रम धावत्या मेट्रोमध्ये साजरा करता येणार आहेत. (Pune News)

डिसेंबर अखेर मेट्रो रेल्वे पिंपरी-चिंचवड महानगरपालिका ते वल्लभनगर आणि वनाझ ते गरवारे महाविद्यालय दरम्यान धावणार आहे. त्यामुळे मेट्रो मध्ये जास्तीत जास्त प्रवाशांना आकर्षित करून घेण्यासाठी महामेट्रो मेट्रो मध्ये लहान मोठे वैयक्तिक, कौटुंबिक कार्यक्रमांना परवानगी देणार आहे. यामध्ये लहान मुलांचे वाढदिवस असो कि ज्येष्ठांचे वाढदिवस मेट्रोमध्ये साजरे करता येणार आहे. यामध्ये विवाहाची बोलणी, साखरपुडा असो कि विवाहाचा वाढदिवस सुध्दा धावत्या मेट्रोमध्ये साजरा करता येणार आहे. हा खर्च अेखाद्या सभागृहाच्या भाड्यापेक्षाही कमी असणार आहे. कार्यक्रम करणाऱ्या गटाला किंवा समुहाला तिकिटांसह अवघे तीन ते पाच हजार रूपये शुल्क आकारले जाणार आहे. महामेट्रो अशा प्रकारचे अभिनव उपक्रम नागपूर मेट्रो मध्ये राबवित आहेत. त्यामुळे पुणे मेट्रो मध्ये सुध्दा असे उपक्रम राबविण्यात येणार असल्याची माहिती मेट्रोच्या अधिकृतसुत्रांनी दिली.

मेट्रो स्थानकावर होणार विविध कार्यक्रम

नागपूर मेट्रो स्थानकावर १५ ऑगस्ट रोजी महिलांसाठी मेंहदी उत्सव रंगला होता.याला महिलांचा चांगला प्रतिसाद मिळाला. त्यामुळे मेट्रो स्थानकावर विविध कार्यक्रमाचे आयोजन करण्याचा विचार महामेट्रोचा आहे. त्यामुळे असे विविध उपक्रम पुणे मेट्रोच्या तीस स्थानकात राबविण्याचे नियोजन असल्याचे अधिकाऱ्यांनी सांगितले.