पुणे : ‘विनोदाचे अनेक अंग असतात, त्यातील द्विअर्थी विनोद प्रकार निवडून दादा कोंडके यांनी संपूर्ण महाराष्ट्राला भरभरून हसायला शिकवले. दादांना ग्रामीण जनतेची विनोदबुद्दीची नस गवसल्याने जनतेने दादांना डोक्यावर घेतले होते,’ असे प्रतिपादन अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी केले.

दादा कोंडके फाउंडेशनतर्फे प्रतिवर्षी देण्यात येणाऱ्या समाजभूषण पुरस्काराचे वितरण सबनीस यांच्या हस्ते झाले, त्यावेळी ते बोलत होते.

यंदा २०२० आणि २०२१ साठी अनुक्रमे दादा कोंडके यांच्या जीवनावर आधारित ‘एकटा जीव’ या आत्मचरित्राच्या लेखिका अनिता पाध्ये आणि रंगत-संगत प्रतिष्ठानचे अध्यक्ष अॅड. प्रमोद आडकर यांना प्रदान करण्यात आला. या वेळी महावितरण पुणे कार्यालयाचे अधिक्षक अभियंता राजेंद्र पवार हे प्रमुख पाहुणे म्हणून उपस्थित होते. व्यासपीठावर दादा कोंडके फाउंडेशनचे प्रमुख विश्वस्त आणि कार्यक्रमाचे निमंत्रक मनोहर कोलते, फाउंडेशनचे सचिव राजेंद्र भवाळकर, जिल्हा सरकारी वकील एन. डी. पाटील आदी उपस्थित होते.

या प्रसंगी महाराष्ट्र सरकारकडून प्रमुख जिल्हा सरकारी वकिलपदी नियुक्ती झालेले अॅड. एन. डी. पाटील, दुग्ध क्षेत्रात उत्तुंग भरारी घेतलेले उद्योगपती नितीन थोपटे, आदिवासी लघुपटांचे निर्माते डॉ. कुंडलिक केदारी, समाज प्रबोधनाच्या कार्याच्या कीर्तनरूपी सेवेबद्दल पूनम जाचक आणि स्केटिंग या खेळात देश पातळीवर सुवर्णपदक मिळविल्याबद्दल वैदेही आणि श्रुतिका सरोदे यांचा सत्कार करण्यात आला.

सुवर्णा माने यांनी कार्यक्रमाचे सूत्रसंचालन केले.