पुणे : पुण्यातील हातकागद संस्थेतर्फे कार्बन उत्सर्जन कमी करण्याच्या हेतूने ९० टक्के हातकागदाचा लगदा व १० टक्के शाडूच्या मातीपासून घडवलेल्या पर्यावरणपूरक गणेशमूर्तींची निर्मिती करण्यात आली आहे. पारंपरिक पद्धतीने घडवलेल्या या नऊ इंचांच्या मूर्तींचे वजन केवळ ५०० ग्रॅम असले तरी त्या बळकट आणि सहज हाताळण्याजोग्या आहेत.

संस्थेच्या वतीने तीन प्रकारांमध्ये या नऊ इंचांच्या मूर्ती घडवण्यात आल्या आहेत. यामध्ये पारंपरिक रंगांचा वापर करत घडवलेल्या मूर्ती, केशरी रंगातील सोनेरी डिझाइन असलेल्या मूर्ती व खास लहान मुलांना स्वत:च्या हाताने रंगविता येण्यासाठी पांढऱ्या रंगातील मूर्तींचा समावेश आहे. हातकागदापासून तयार केलेल्या या मूर्तींचे पाण्याच्या बादलीत विसर्जन केल्यानंतर त्या सहज विरघळून जातात. शिवाय पुन्हा कागद्याच्या लगद्यामध्ये रूपांतर करून त्यांचा पुनर्वापरही करता येऊ शकतो.

या मूर्तींसह पेण येथील मूर्तीकारांनी कागदाचा लगदा व शाडू मातीपासून घडवलेल्या मूर्ती शिवाजीनगर परिसरातील कृषी महाविद्यालयाला लागून असलेल्या के. बी. जोशी मार्गावरील पुणे हातकागद संस्थेच्या आवारात विक्रीसाठी उपलब्ध आहेत. तसेच संस्थेच्या फेसबुक व इन्स्टाग्राम पेजवरदेखील याबाबत माहिती उपलब्ध करून दिली आहे.