पुणे : स्पर्धा परीक्षांचा अभ्यास करणाऱ्या विद्यार्थ्यांना दिलासा देण्यासाठी महापालिकेने स्पर्धा परीक्षा केंद्र ५० टक्के क्षमतेने खुले करण्याचा निर्णय घेतला आहे. तसेच आठवड्याचे सर्व दिवस आउट डोअर व इनडोअर गेम खेळता येणार आहेत. यासाठी लसीकरण अनिवार्य असणार आहे. याबाबत शुक्रवारी अतिरिक्त आयुक्त रुबल अग्रवाल यांनी आदेश काढले आहेत.

कोरोनामुळे शहरात तिसऱ्या स्तराचे नियम लागू झाल्याने कोचिंग क्लास बंद केले होते. ऑनलाइन वर्ग सुरू होते. मात्र, महापालिकेने आता स्पर्धा परीक्षा केंद्र व क्लासेस सोमवार ते शुक्रवारपर्यंत सकाळी ७ ते दुपारी ४ या वेळेत ५० टक्के क्षमतेने सुरू करण्यास परवानगी दिली. या ठिकाणी येणारे विद्यार्थी व शिक्षकांना किमान कोरोना प्रतिबंधक लसीचा पहिला डोस घेतलेला असणे आवश्‍यक आहे.

महापालिकेच्या हद्दीतील सर्व आउटडोअर व इनडोअर खेळ आठवड्याचे सर्व दिवस दुपारी चारपर्यंत खेळता येणार आहेत. या ठिकाणी सर्व खेळाडू व कर्मचाऱ्यांना लसीचे दोन्ही डोस झालेले असणे अनिवार्य आहे. हे नियम पुणे कॅन्टोन्मेंट व खडकी कॅन्टोमेंटला देखील लागू असणार असल्याचे आदेशात नमूद केले आहे.