पुणे : सोलापूर जिल्ह्यातील बोरगाव (ता.माळशिरस) येथील साठे कुटुंबीयांवर झालेल्या अन्यायाच्या विरोधात पुणे शहर जिल्हा मातंग समाजाच्या वतीने बुधवारी येथील विभागीय आयुक्त कार्यालयासमोर जोरदार निदर्शने करण्यात आली.

बोरगाव (ता.माळशिरस) येथील स्मशानभूमीत मातंग समाजातील कुटुंबाला मृत व्यक्तीच्या अंत्यविधीस परवानगी दिली नाही. या घटनेचा राज्यभरात निषेध करण्यात येत आहे. शहर आणि जिल्ह्यातील मातंग समाजासह विविध संघटनांच्या वतीनेही या घटनेचा निषेध करण्यात आला. या घटनेस दोन आठवडे उलटूनही आरोपींना अद्याप अटक करण्यात आलेली नाही. आरोपींना कठोर शिक्षा करण्यात यावी. पीडित कुटुंबाचे पुनर्वसन करण्यात यावे, यासह विविध मागण्यांचे निवेदन विभागीय आयुक्त सौरभ राव यांना देण्यात आले. पीडित कुटुंबातील दशरथ साठे या वेळी उपस्थित होते.

या आंदोलनात नगरसेवक सुभाष जगताप, पुणे शहर जिल्हा मातंग समाजाचे अनिल हातागळे, राजाभाऊ धडे, विनोद शिंदे, लहुजी शक्ती सेनेचे शंकर तडाखे, दलित युवक आंदोलनाचे सचिन बगाडे, ॲड. राजश्री अडसूळ, रवी पाटोळे, मातंग एकता आंदोलनाचे विठ्ठल थोरात, महेश सकट, संजय केंदले यांच्यासह शहरातील इतर राजकीय पक्ष, संघटनेचे प्रमुख पदाधिकारी आणि कार्यकर्ते सहभागी झाले होते.