पुणे : पुणे महानगरपालिकेतील भारतीय जनता पक्षाच्या नगरसेविका असलेल्या अर्चना मुसळे यांचा पतीने आणि भावाने एका रहिवाशाला मारहाण केल्याचा प्रकार उघडकीस आला आहे. याबाबत चतु:शृंगी पोलिस ठाण्यात तक्रार देण्यात आली आहे. या मारहाणीचा एक व्हिडिओ व्हायरल झाला आहे.

अर्चना मुसळे या भारतीय जनता पक्षाच्या औंध प्रभागातील नगरसेविका आहेत. औंध परिसरातीलच क्लोरियन पार्क या इमारतीत त्या वास्तव्यास आहेत. मारहाण करण्यात आलेली व्यक्ती देखील याच इमारतीत राहते. संबंधित व्यक्तीने मुसळे यांच्या विरोधात बदनामी करणारी पत्रके वाटली असल्याचा आरोप करत ही मारहाण करण्यात आली असल्याचे सांगितले जात आहे. याप्रकरणी चतु:शृंगी पोलीस ठाण्यात दोघांनीही एकमेकांविरोधात तक्रारी दिल्या आहेत. त्यानुसार पोलिसांनी अदखलपात्र गुन्हा दाखल केला असून अधिक तपास पोलीस करत आहेत.