पुणे: अतिवृष्टीमुळे होणारे भूस्खलन आणि दरडींच्या दुर्घटना रोखण्यासाठी राज्य सरकारच्या वतीने तज्ज्ञ समितीची गठण करण्यात आले आहे. भारतीय तंत्रज्ञान संस्था मुंबईचे प्राध्यापक डॉ. रवि सिन्हा यांच्या अध्यक्षतेखाली १० सदस्यांची समितीची अधिकृत घोषणा बुधवारी करण्यात आली.

राज्यात गेल्या काही वर्षांपासून दरड कोसळणे आणि भुस्खलनाच्या दुर्घटनांमध्ये मोठ्या प्रमाणावर वाढ झाली आहे. रायगड, कोल्हापूर आणि घाटमाथ्यावरील भागात पावसाळ्यात अशा दुर्घटनांमुळे जीवित हानीही होत आहे. अशा आपत्तीच्या संभाव्यतेचा अभ्यास करण्यासाठी, तसेच आपत्ती प्रवण क्षेत्रे निश्चित करण्यासाठी ही समिती गठित करण्यात आली आहे.

यामध्ये प्रभाकर देशमुख, सावित्रीबाई फुले पुणे विद्यापीठातील भू-शास्त्र विभागाचे निवृत्त विभागप्रमुख डॉ. सतीश ठिगळे, भूगर्भशास्त्र विभागाच्या सहाय्यक प्राध्यापिका डॉ. भावना उंबरीकर, सिंबायोसिसचे प्राध्यापक डॉ. टी.पी.सींग, डॉ. अभिजित खांडगे, भारतीय भूवैज्ञानिक सर्वेक्षणाचे प्रतिनिधी, पुण्यातील शासकीय अभियांत्रिकी महाविद्यालय आणि भूजल सर्वेक्षण व विकास संस्थेचे प्रतिनिधी आदींचा समावेश आहे.

"समितीची नुकतीच अधिकृत घोषणा झाली असून, बैठकीनंतर समितीची पुढील कार्यवाही निश्चित होईल. भूस्खलनाबरोबरच कोकण आणि सह्याद्रीतील वातावरणीय बदलाचा अभ्यासावरही आमचा भर असेल."- डॉ. सतीश ठिगळे, भू-शास्त्रज्ञ, समितीचे सदस्य