किरकटवाडी: खानापूर (ता.हवेली) येथे एका तरुणावर चार ते पाच जणांनी कोयत्याने वार (Attack) केल्याची घटना घडली आहे. अक्षय शिंदे असे या घटनेत गंभीर जखमी झालेल्या तरुणाचे नाव आहे. जखमी तरुणाच्या नात्यातील एक महिलाही झटापटीत जखमी झाली आहे. हल्ल्याचे कारण अद्याप अस्पष्ट आहे. (Pune Crime News)

हवेली पोलीसांनी दिलेल्या माहितीनुसार रात्री साडेआठ ते नऊ वाजेच्या सुमारास ही घटना घडली आहे. अक्षय शिंदे हा घरासमोर उभा असताना तेथेच आजुबाजुला राहणाऱ्या चार ते पाच तरुणांनी अचानक येऊन कोयत्याने वार करण्यास सुरुवात केली. जीव वाचविण्यासाठी अक्षय घरात पळाला असता आरोपींनी पाठलाग करुन हल्ला केला. यावेळी झालेल्या झटापटीत एक महिलाही किरकोळ जखमी झाली आहे.

घटनेची माहिती मिळताच हवेली पोलीस ठाण्याचे पोलीस निरीक्षक सदाशिव शेलार व इतर पोलीस कर्मचारी तातडीने घटनास्थळी दाखल झाले. जखमी तरुणाला उपचारांसाठी खाजगी दवाखान्यात दाखल करण्यात आले असून हल्ला करुन फरार झालेल्या आरोपींचा शोध सुरू असल्याची माहिती पोलीस निरीक्षक शेलार यांनी दिली आहे.