Pune Leopard News : निरगुडसर जवळील वखारवाडी येथील शेतकरी पोपट सयाजी बाणखेले या शेतकऱ्याच्या कालवडीवर बिबट्याने हल्ला करून ठार केल्याची घटना सोमवार (ता.१८)रोजी मध्यरात्री घडली.

परिसरात गेल्या दीड महिन्यात ही तिसरी कालवड बिबट्याने ठार केली असून वनविभागाकडे पिंजरा लावण्याची मागणी करून देखील पिंजरा लावण्याकडे दुर्लक्ष केले जात आहे.बिबट्याच्या दहशतीमुळे शेतकरी धास्तावला असून वनविभाग मात्र सुस्तावल्याचे चित्र दिसत आहे.

आंबेगाव तालुक्यातील भराडी गावानजीक वखारवाडी आहे. या भागात उसक्षेत्र मोठ्या प्रमाणात असल्याने बिबट्याचा वावर मोठ्या प्रमाणात आहे.सोमवार (ता.१८)रोजी मध्यरात्री पोपट बाणखेले यांचा नऊ महिन्याचा कालवडीवर बिबट्याने हल्ला करून ठार केले ही घटना मंगळवार (ता.१९) रोजी सकाळी उघडकीस आली.

घटनेची माहिती पोलिस पाटील संतोष खिलारी यांनी वनविभागाला दिली.याअगोदर याच परिसरातील अजित बाळु गावडे व रामदास बजाबा बांगर या शेतकऱ्यांच्या दोन कालवडींवर बिबट्याने हल्ला करून ठार मारले आहे,गेल्या दीड महिन्यात ही तिसरी घटना घडली आहे.संबधित शेतकऱ्यांनी बिबट्याला जेरबंद करण्यासाठी वारंवार पिंजरा लावण्याची मागणी केली असून देखील वनविभाग याकडे दुर्लक्ष करत आहे.

या परिसरात बिबट्याच्या डरकाळ्या वाढल्या असून दिवसाही बिबट्याचे दर्शन नागरिकांना होत आहे,यामुळे शेतीकामे करण्यास शेतकरी शेतात जाण्यास धास्तावस आहे तरी वनविभागाने तातडीने या भागात पिंजरा लावावा अशी मागणी शेतकरी पोपट बाणखेले यांनी केली आहे.