पुणे : जिल्ह्यातील खासगी रुग्णालयांना गेल्या दोन दिवसांत मागणीच्या तुलनेत रेमडिसिव्हीर इंजेक्शनचा समाधानकारक साठा उपलब्ध झाला आहे. यामध्ये १२००० इंजेक्शनचे डोस असून त्यामुळे पुण्यातील रुग्णांना काहीसा दिलासा मिळाला आहे. पुणे, पिंपरी-चिंचवड शहर आणि ग्रामीण भागातील ६२७ खासगी कोविड रुग्णालयांमध्ये १६ हजार २१७ ऑक्सिजनयुक्त आणि आयसीयू बेड्स उपलब्ध आहेत. त्या तुलनेत कोरोनाबाधित रुग्णांसाठी जिल्हा प्रशासनाकडून रुग्णालयांना बुधवारी १२ हजार ५१ रेमडिसिव्हीरचा पुरवठा करण्यात आला आहे.

खासगी रुग्णालयांना बेड्सच्या प्रमाणात रेमडिसिव्हीरचा पुरवठा करण्यात येत आहे. आज गुरुवारी (ता.५) जिल्ह्यातील ५५७ रुग्णालयांमधील १३ हजार ८०५ बेड॒सच्या तुलनेत ९ हजार ७५६ रेमडिसिव्हीर इंजक्शन उपलब्ध झाले आहेत. आरोग्य विभागाच्या सूचनेनुसार गरजू रुग्णांसाठी या इंजेक्शनचा वापर करावा. तसेच, रुग्णालयांनी रुग्णांच्या नातेवाइकांना या इंजेक्शनसाठी प्रिस्क्रिप्शन लिहून देऊ नये, असे आवाहन अतिरिक्त जिल्हाधिकारी विजयसिंह देशमुख यांनी केले आहे.

रेमडीसिव्हिरचा काळा बाजार सुरूच

भरारी पथकांमार्फत रुग्णालय स्टॉकिस्ट आणि वितरकांकडील रेमडिसिव्हीर आणि त्याच्या वापरावर नियंत्रण ठेवण्यात येत आहे. परंतू, त्याचा काळा बाजार सुरूच असल्याच्या घटना समोर येत आहेत. त्यामुळे भरारी पथकांकडून कठोर कारवाई करण्यात यावी, अशी मागणी रुग्णांच्या नातेवाइकांकडून करण्यात येत आहे.

पुणे जिल्ह्यातील रेमडीसिव्हिरचा पुरवठा (चार आणि पाच एप्रिल) :

खासगी रुग्णालये : ६२७

ऑक्सिजन आणि आयसीयू बेड्स : १६ हजार २१७

रेमडीसिव्हिर उपलब्ध : १२ हजार ५१