जुन्नर, ता. ७ : जुन्नर तालुक्याचे भूमिपुत्र माजी सैनिक रमेश खरमाळे यांना स्वातंत्र्य दिनानिमित्त राष्ट्रपती भवन येथे होणाऱ्या समारंभासाठी आमंत्रित केले आहे.
खरमाळे परिवार वडज येथे ऑक्सिजन पार्कमध्ये वृक्षारोपण करत असताना पुणे भारतीय डाक विभागाच्या अधिकारी व कर्मचाऱ्यांनी राष्ट्रपतींचे पत्र त्यांना दिले. खरमाळे कुटुंबाने पर्यावरणासाठी बीज संकलन व रोपण करणे, वृक्षारोपण, पशू-पक्ष्यांचे संवर्धनासाठी पाणवठे करणे, जमिनीतील पाण्याची पातळी वाढण्यासाठी जलशोषक चर खोदणे, प्लास्टिक संकलन करणे, जखमी पशू-पक्षी रेस्क्यू, शालेय विद्यार्थ्यांना पर्यावरणपूरक व्याख्याने देणे आदी कामात झोकून दिले आहे.
वडज येथील ऑक्सिजन पार्कच्या निर्मितीची पंतप्रधान नरेंद्र मोदी यांनी ‘मन की बात’ या कार्यक्रमात दखल घेतली होती. त्यांच्या कार्याचा यथोचित गौरव म्हणून राष्ट्रपती भवनात त्यांना निमंत्रित केले आहे. ‘सकाळ’ने खरमाळे यांच्या कार्याची दखल घेत सन २०२३- २४ मध्ये पुरस्काराने गौरविले आहे.

तळागाळातील लोकांच्या कार्याची दखल देशाचे पंतप्रधान व महामहीम राष्ट्रपती यांच्याकडून घेतली जाते, हा संदेश निश्चितच पर्यावरण प्रेमींपर्यंत जाईल. पर्यावरणासाठी नि:स्वार्थीपणे झटणाऱ्या सर्वांचा सन्मान आहे. त्यामुळे या क्षेत्रात काम करणाऱ्या व्यक्ती व संस्थांना अधिक बळ आणि प्रोत्साहन मिळेल. आमच्या कुटुंबाला जीवनात तेवढा आनंद झाला नाही, तेवढा आनंद ‘मन की बात’ कार्यक्रमात सन्माननीय पंतप्रधान यांनी घेतलेली दखल व त्यानंतर राष्ट्रपतींनी दिलेल्या आमंत्रणामुळे झाला आहे. त्यामुळे भविष्यात पर्यावरणासाठी अधिक ताकदीने काम करण्याची ऊर्जा मिळाली आहे.
- रमेश खरमाळे

वडज (ता. जुन्नर) : पुणे डाक विभागाकडून निमंत्रण स्वीकारताना खरमाळे कुटुंब.