नारायणगाव, ता. १३ : विनापरवाना बेकायदेशीररित्या गावठी कट्टा बाळगल्याप्रकरणी खोडद (ता. जुन्नर) येथील दोन तरुणांना स्थानिक गुन्हे शाखा पथकाने अटक केली. त्यांच्याकडून तीस हजार रुपये किमतीचा गावठी कट्टा जप्त केला आहे. यातील एक आरोपी खोडद येथील महाकाय दुर्बीण प्रकल्प (जीएमआरटी) येथे कंत्राटी कामगार असल्याची प्राथमिक माहिती तपासात मिळाली आहे, अशी माहिती पोलिस उपनिरीक्षक जगदेव पाटील यांनी दिली.
याप्रकरणी जितेंद्र रोहीदास पानमंद (वय ३५, रा. पानमंद मळा, खोडद), पप्पू निसाद (वय २८, सध्या रा. खोडद, मूळ उत्तर प्रदेश) यांना अटक केली आहे. दोन्ही आरोपींना पोलिस कोठडी दिली आहे. यापैकी जितेंद्र पानमंद हा खोडद येथील जीएमआरटी प्रकल्प येथे कंत्राटी कामगार म्हणून कार्यरत आहे. त्याच्याकडे गावठी कट्टा असल्याची माहिती स्थानिक गुन्हे शाखेचे सहाय्यक पोलिस निरीक्षक महादेव शेलार यांना मिळाली होती. स्थानिक गुन्हे शाखा पथकाने जीएमआरटी प्रकल्पाच्या प्रवेशद्वाराजवळ त्याला सापळा रचून ताब्यात घेतले. त्याची अंगझडती घेतली असता त्याच्या कमरेला गावठी कट्टा आढळून आला. तो त्याने त्याचा साथीदार पप्पू निसाद याच्या मदतीतून उत्तर प्रदेश येथून खरेदी केला असल्याचे पोलिस तपासात निष्पन्न झाले.
ही कारवाई सहाय्यक पोलिस निरीक्षक शेलार, प्रवीण सपांगे, सहाय्यक फौजदार दीपक साबळे, हवालदार संदीप वारे, राजू मोमीन, अक्षय नवले यांनी केली.