खेड शिवापूर, ता. २१ : राजगड पोलिसांनी पुणे- सातारा महामार्गावरील खेड शिवापूर बाग (ता. हवेली) येथे सुरू असलेल्या तीन पत्ती जुगार अड्ड्यावर छापा टाकून १७ जणांवर गुन्हा दाखल केला. या कारवाईत रोख रक्कम आणि पत्ते जप्त केले. आरोपींविरुद्ध महाराष्ट्र जुगार प्रतिबंधक कायद्यान्वये गुन्हा दाखल केला आहे.
या प्रकरणी पोलिस शिपाई अक्षय सुभाष नलावडे यांनी फिर्याद दिली आहे. राजगड पोलिस ठाण्याचे पोलिस निरीक्षक राजेश गवळी यांना खेड शिवापूर येथील हॉटेल गार्गी शेजारील इमारतीतील पहिल्या व दुसऱ्या मजल्यावर तीन पत्ती जुगार सुरू असल्याची गोपनीय माहिती मिळाली. त्यानुसार त्यांनी राजगड पोलिसांचे एक पथक सदर ठिकाणी रवाना करून छापा टाकण्यास सांगितले. तेथे गेलेल्या राजगड पोलिसांना घटनास्थळी १७ जण तीन पत्ती जुगार खेळताना आढळले. त्यामध्ये मकरंद दत्ता मेदने (वय २९, रा. सिंहगड रोड), अमित ऊर्फ गोपाळ शिवाजी चिकुदरे (वय ३९, रा. बिबवेवाडी), वैभव सुभाष थोपटे (वय २७, रा. माणिक बाग), ज्ञानेश्वर गजानन बालपांडे (वय ३२ वर्ष, रा. सिंहगड रोड, धायरी फाटा), विठ्ठल बाळू दारवटकर (वय २९, रा. पर्वती, जनता वसाहत), विनायक राम चित्ते (वय ५२ वर्ष, रा. गुरुवार पेठ, क्षत्रीय भवन), गोकूळ वामन धोबी (वय ४६, रा. खेड शिवापूर), अनिल शशिराव माने (वय ४१, रा. हडपसर), फारुक याकूब शेख (वय ३९, रा. खेड शिवापूर), लखन महादेव बसटे (वय ३४, रा. सुखसागर नगर), राजकुमार केरबा शिखरे (वय ४८, रा. खेड शिवापूर), सलीम शाकीर शहा (वय ३०, रा. खेड शिवापूर), शब्बीर शेख याकूब (वय ४४, रा. खेड शिवापूर), योगेश रकनेश मिश्रा (वय ४२, रा. हडपसर, शिंदे वस्ती), राकेश रवींद्र राऊत (वय ३२, रा. वडगाव बुद्रुक), पंकज प्रकाश गायकवाड (वय ३३ वर्ष, रा. वडगाव बुद्रुक), अमित पांडुरंग राऊत (वय ३६, रा. कोथरूड, पुणे) यांचा समावेश आहे.
ही कारवाई शुक्रवारी (ता. २०) सायंकाळी ५ वाजण्याच्या सुमारास करण्यात आली. यावेळी प्रत्येक आरोपीच्या अंग झडतीतून जुगार खेळण्यासाठी वापरलेले तीन पत्ते आणि रोख रक्कम जप्त केली. त्यामध्ये २०८ पत्त्याचे कॅट व २८ हजार ३०० रुपये रोख रकमेचा समावेश आहे. याबाबतचा अधिक तपास पोलिस उपनिरीक्षक अजित पाटील करीत आहेत.