कवठे येमाई, ता. १३ : मलठण (ता. शिरूर) येथे कौटुंबिक वादातून भाच्याने आत्यावर तलवारीने हल्ला केल्याची धक्कादायक घटना घडली आहे. या हल्ल्यात आत्या जखमी झाली असून, शिरूर पोलिसांनी तीन जणांविरुद्ध गुन्हा दाखल केला आहे.
मिळालेल्या माहितीनुसार, सुरेखा शंकर पंडित (वय ५४, रा. लोणी मावळा, ता. पारनेर, जि. अहिल्यानगर) या त्यांच्या आईकडे मलठण येथे आल्या होत्या. त्या आई वडिलांच्या खोलीत भांडी ठेवत असताना त्यांचा भाचा निखिल राजेंद्र क्षीरसागर हा घरात आला. त्याने, ‘तू घरात कशाला आलीस? तुझा काय संबंध?’ असे म्हणत शिवीगाळ व दमदाटी केली. त्यानंतर त्याने तलवार घेऊन आत्याच्या गळ्याला लावत सुरेखा पंडित यांना जखमी केले. दरम्यान, सुरेखा यांचा भाऊ राजेंद्र शांताराम क्षीरसागर व वहिनी शारदा राजेंद्र क्षीरसागर यांनी देखील, ‘तू इथे कशाला आलीस?’ असे म्हणत शिवीगाळ, दमदाटी करत लाथाबुक्क्यांनी मारहाण केली, असे फिर्यादीत नमूद आहे. या घटनेनंतर सुरेखा पंडित यांनी शिरूर पोलिस ठाण्यात फिर्याद दिली. पोलिसांनी निखिल राजेंद्र क्षीरसागर, राजेंद्र शांताराम क्षीरसागर आणि शारदा राजेंद्र क्षीरसागर (सर्व रा. मलठण) यांच्याविरुद्ध गुन्हा दाखल केला. पुढील तपास पोलिस निरीक्षक संदेश केंजळे यांच्या मार्गदर्शनाखाली पोलिस हवालदार गणेश पालवे करत आहेत.