तळेगाव ढमढेरे, ता. १३ : विठ्ठलवाडी (ता. शिरूर) दोरगे वस्ती येथील शेतकरी सुदाम दोरगे यांच्या चार चाकी वाहनाचा बुधवारी (ता. १२) रात्री दोन वाजता बिबट्याने पाठीमागून घरी येईपर्यंत पाठलाग केला. गाडीतून उतरताच त्यांच्या मुलाने गाडीच्या पाठीमागे बिबट्या असल्याचे निदर्शनास आणले. कुत्र्यांचा व माणसांचा आवाज ऐकून बिबट्याने धूम ठोकली. यापूर्वी दुचाकीचा पाठलाग केल्याचे ऐकवात होते, परंतु माझ्या चार चाकी गाडीच्या पाठीमागे सुमारे ६०० मीटर बिबट्याने पाठलाग केल्याचे पहिल्यांदाच पाहण्यात आले. आमच्या शेजारच्या घरीही बिबट्याचे दर्शन झाले. यापूर्वीही अनेक वेळा विठ्ठलवाडी परिसरातील शेतामध्ये अनेक शेतकऱ्यांना बिबट्याचे दर्शन झाले असल्याचे दोरगे यांनी सांगितले. विठ्ठलवाडी परिसरात तीन ते चार बिबटे असून वनविभागाने येथील परिसराची पाहणी करून त्वरित पिंजरा लावावा अशी मागणी शेतकरी सुदाम दोरगे यांनी केली.